ISRAEL RAMAH MIHRING HA KUM 200,000 A UPA AN HMUCHHUAK !
~ Ziaktu: CT Lalrinawma
Republic Day, 2018(MSR): Bible-Genesis bung 4-ah chuan Pathianinin mihring a siam hmasak ber Adama leh Evi te fa pahnih “Kaina leh Abela” chanchin kan hmu a, chu bung 4naah chuan lo an vah dan leh an neih dan zawng chu ziak lan a ni lo. Mahse, an unau chuan nu leh pa thuawih takin “Lovah an feh” dun (4:8) tih kan hmu a ni. Chutah chuan Kaina chuan a nau Abela a that tih kan hria, an inhau tan dan zawng zawng an tawngkam te leh Adama leh Evi mangan thute erawh ziak lan a ni lo. An mangang hle turah ngai ang!
Chumi hnuah “Kaina chu LALPA hnen a ta chhuakin Eden chhak lama Nod ramah chuan kalin a awm ta”(Gen 4:16). Engtin nge a inben bel taka in leh lo a din dan ziak lan vek a ni lo. Eden chhak lam atanga Nod kal chhung chu, ke ngatin ni engzatnge a kal a, a tam chhawl leh chauh dan kan hre zui lo. Mihring dang lo awm thu erawh chu kan hre ta. Gen 4:17 ah chuan, “Kaina chuan a nupui a pawl a, a rai a, Enoka a hring a”; chutah khua a din chhova, in engzatnge, chhungkaw engzatnge, mihring engzatnge cheng kan hre zui lo. Enoka hming chawia phuah “Enok” khua chu a len leh len loh pawh kan hre lo a ni.
Bible hi Thlarau Thianghlim nena chik taka chhiar a, ngaihtuah zui chuan a ropuizia leh rilzia a lo lang thin. Leilung-khawvel upat dan pawh mihring thiamna leh finna hmanga chhut chhuah chi a ni lo. “Evolution theory” anga “Mihringte Zawng thlah” tihte hi awih chi a ni lo! Pathian mite rilruah zawk chuan, “Zawng thlah te u” tih aiin, “Rul thlah te u...”(Lk 3:7) tih a ni zawk a ni. Zawng thlah, zawng atanga piang lo ni ila chuan, Baptis-tu Johana pawh khan “Rul thlah te u” tih aiin, “Zawng thlah te u” a tih a rinawm.
Salvation Camping leh Crusade-ah Counselor-in tunhmain ka tang ve zauh zauh tawh a, zawhna mak sak chhan tur a awm fo thin. “Evi thlemtu rul kha a nu nge a pa?”, “Engtin nge rul kha a hmain a kal thin?”, “Kaina khan nupui neih tur a hmu leh thuai si, Adama te chhungkua chauh mihring hmasa an ni dawn em ni?”, “Bible sawi danin khawvel hi kum 6,000 erawh awrh chauh niin alang si, Scientist ten kum maktaduai a upa te an ti bawk si”, etc. tihte a ni thin. Bible min zirtir tum ni lem lo ngaihtuah daih hi thil awl tak a ni!
Upa pakhat pawhin, “Tiau kama in sa” tih Isua tehkhin thu sermonah a sawi dawn a, “He ta bible a ziah lan lutuk loh, “thli” chanchin hi a ni ka sawi dawn ni...” a ti daih a, ngaithlatute an nui hak. National Highway-black topping road aiin, Chehpa road zawh hi thil harsa a ni lo! Mihringte chu “short-cut” hmang duhtu kan ni fo thin.
Tun hnaiah Israel ramah Scientist rualten khawvela mihring ruhro (human fossil) an hmuh chhuah thar chu kum 200,000 zeta upa a ni tlat mai! Africa-Eurasia ramah kum 60,000 aia upa zet mihring ruhro ( Neanderthals-Denisovans) an lo hmuh chhuah a khum ta daih hian ngaihtuah a ti thui hle. Chinaah pawh mihring ha (teeth) kum 100,000 an lo hmu chhuak tawh bawk.
(1) Morocco ram Jerel Irhoud ah kum 30,000 zeta upa mihring ruhro (Homo sapiens fossils) an lo hmu chhuak tawh a
(2) Ethiopia ram Herto leh Omo Kibishal-ah Homo sapiens fossil hi kum 195,000-160,000 upa an lo hmu chhuak tawh bawk a
(3) Misliya, Mount Carmel, Israel a puk pakhatah mihring ha kum 177,000-194,000 tura upa hmuh chhuah leh a ni. Israel rama tun hnaia mihring ruhro hmuh chhuah thar ber hi khawvela an hmuh chhuah zinga upa ber (oldest human fossil) a ni.
Prof. Israel Hershkovitz, University of Tel Aviv chuan, “Keimahni mihring thlahte (own species) tan revolution a ni e” a ti hial. Karmel tlang Misliya puka mihring ha an hmuh chhuah hi khabe ruh chung lam (upper jaw bone) a mi a ni a, ha hi 8 a lo la awm a ni. Khawvel hmun danga ha an hmuh chhuah aiin a lian zawk hlek tih a ni. Pukah chuan sanghal sa eina niawm leh satel leh ostrich sa eina niawm a ngaih theih tur hmanruate pawh a awm, an ti. He ha hi Radio-active hmanga enfiah a nih hnuah kum 200,000 dawna upa (177,000-194,000) a ni tih hriat a ni.
Africa rama an hmuh chhuah mihring ruhro te chu an upa hle na in, Prof. Hershovitz chuan, “Mihringte chu Africa atanga chhuak vek (exodus) an nih a rinawm lohva, chung kum sang tam tak liam ta hun lai chuan an chhuakin an lut vel a nih a rinawm zawk a ni” a ti. Mihring ruhro upa zet zet chu Samutra, China ah kum 70,000 a upa te, Northern Australia ah kum 65,000 a upa te an lo hmuchhuak tawh bawk.
Scientists te chuan mihring hmasate chuan Mediterannean ram chhak lam chu Neanderthal-hoten Europe kal vel nana an hman thin, kawng a nih a rinawm, an ti. Germany ah Neanderthal-ho ruhro an hmuh chhuahte chu DNA test atangin kum 200,000 dawna upa a ni a, Neanderthal DNA hi tuna Eurasean hote nen 1-4% a la in ang, niin an sawi.
Bible hian kimchang takin thil min chhinchhiah sak vek lo va. A chunga kan han sawi enna atang ringawt pawh “hun bi, kum bi” tam tak, sang bi thlengin a tidanglam dawrh dawrh thei a ni. Bung 1 chhunga “chang khat leh chang khat” inkarah ringawt pawh hian thutam tak, khawvel miten kan hriatfiah ngai dawn loh leh hriatfiah vek loh tur a inziak, phumru teuh thei tih hi hriatreng tur a ni.
Entirnan, “Pathian Thlarau chuan tui chungte chu a awp reng a” (Gen 1:2) tih pawh hi “awp reng” tih hi engtia rei nge, kum engzat nge, kum khat nge, kum sang nge, kum nuai, maktaduai, tluklehdingawn tel nge, tih kan hre miah lo a nih hi! Pa pakhat chuan, “Ka arpui tui lai chu a lo awp reng tawh mai a!” a ti a, ni engzat nge a awp a sawi lova. Arpui hian a tlangpuiin ni 21 velah no a awp keu thin an ti a; ni khat, darkar khat chhung ringawt pawhin khawvel hi a danglam nasa thei hle a nih hi. Chuvangin, Bible-in mihringte tana kan hriat tul awm chin, “Pathian Thlarauvin” a mite kal tlanga min hriattir- ziak chhuah hi i pawm tlat ngam ang u. Pathian Thu hi “Pathian thawk khum” a ziak a ni si a.
*Thuvawn: “Pathian thu hi a nung a, thil a ti thei a, khan daih hriam tawn eng ang ai pawhin a hriam a, nunna leh thlarau, ruhtuah leh thling phel hrang thei khawp hialin a chhun thei a, thinlung ngaihtuah leh tumte hi a hre nghal thei a ni” (Heb 4:12)@CT Lalrinawma
Post a Comment