Mizoram People Forum (MPF) pisa chu nimin khan kum 2018 atan MPF president Rev. F Lalrinnunga'n a hawng. MPF President chuan, zu leh ruihhlo dangin Mizo ṭhalaite a tihbuai nasat thu leh Mizoram siamṭha turin nasa taka ṭan lak a ngaih thu a sawi.
Rev. F Lalrinnunga chuan, zu leh ruihhloin Mizo ṭhalaite a tihbuai nasat thu a sawi rualin, a tihbuai loh ṭhalai tam tak an awm thu a sawi a, "Zu leh ruihhloin a tihbuaite chhan chhuak tur hian Pathianin min hmang zel a ni," a ti. Mizoram politics pawh Pathian chakna hmanga siam ṭhat theih a nih thu sawiin, "Pathian duh zawnga kan awm chuan kan ram hi rei tak kan luah ang a, kan hmuingilin hma kan sawn zel dawn a ni," a ti.
MPF general secretary Rev. Dr R Lalbiakmawia'n MPF hmachhawp hnaivaite sawiin, Aizawl West-II constituency tan January 11-ah Chawnpui Presbyterain Kohhran Hall-ah leh January 13-ah Mamit constituency tan Lengpui Kohhran Hall-ah seminar buatsaih tum a nih thu a sawi a; Chakma district-ah MPF din thar leh dan zawn mek a nih thu a sawi bawk.
MPF pisa hawnna inkhawmah hian MPF Governing Board member-te leh thuthar thehdarhtute an tel a ni. -Vanglaini
Post a Comment