MIZO THALAITE TAN YOUTH SUMMIT BUATSAIH A NI DAWN: He thu hi Mizoram Youth Commission Chairman Pu Joseph Lalhimpuia chuan vawiin chawhmaa a office thar luahnaah a sawi a, he hunah hian MLA Pu T. Sangkunga, MLA Pu Chalrosanga, Labour & Employment Department leh Youth Commission hotute leh MZP, MSU, NSUI leh MPYCC hruaituten an telpui a. Zirlai pawl hruaitute nen hian Mizoram thalaite hmasawnna tur leh harsatna hrang hrang sutkian dan turte an sawiho a ni. Pu Joseph Lalhimpuia chuan chawhnu lamah Kohhran hrang hrang thalai hruaitute inkawmhona hun neihpui bawkin hetah hian KTP, MTKP, DCTP, TSAY, AY, PYD (MZ) leh PYD (NEI) hruaitute an tel a ni.
Mizoram Youth Summit: Office thar luahnaah hian MYC Chairman Pu Joseph Lalhimpuia chuan thalaite khawvel thar siam zel nan leh sawrkar inrelbawlna atana ngaihdan sawihona te, zirna lam kawnga inkawhhmuhna, infiamna leh khawtlang nuna hmasawnna tur zirhona atan Mizoram chhunga District tinah ‘Youth Summit and Road Show’, School Education Department nena tangkawpa buatsaih a nih tur thu a sawi a. Pu Joseph Lalhimpuia chuan MYC in a kalpui mek Banking, Staff Selection Commission (SSC), UPSC Coaching, Army & Paramilitary Forces Pre-Recruitment Training, Aviation & Soft Skill Training leh sawrkar hnathawkte tana IT Training a buatsaih thin te chu chhunzawm zel anih tur thu sawiin hmalakna tura a hmachhawpte a tarlang nghal a. Indian Institute of Technology (IIT) leh India rama Medical College tha a luh tumte tan MYC chuan National Eligibility cum Entrance Test (NEET) Coaching buatsaih a tum thu leh hma lak mek anih thu Pu Joseph Lalhimpuia chuan a sawi a. Mizo thalai lehkhathiam ram danga hnathawk duh tan kawng inhawn theihnan hmalak tum anih thu leh India ram University hrang hranga Mizo zirlai Post-Graduate a tithate leh UPSC/Central sawrkar hnuaia Group-A officer inziak tlingte tan cash incentive peka chawimawina hun siam thin tum anih thu a sawi bawk a ni.
MIZORAM YOUTH SUMMI: Pu Joseph Lalhimpuia chuan thalaite hawizauna tur leh hmasawn nan exposure trip buatsaiha state capital, district administration leh project site te an tlawh theihna tur ruahman a nih thu a sawi a. Thalaite khawvel thar siam tur leh hmasawnna chak tak awm tur chuan sawrkar ringawt atanga hmalak a tawk lo tiin thalai ten an thiamna tangkai tak leh phur taka an pho chhuahna tur platform tha ngaihtuahpui tur leh hlawhtlinna kawnga fuih phur turte in tlawmngai pawl, zirlai pawl leh Kohhran thalaite thawhpuiah a sawm a ni.
MYC Chairman leh Kohhran thalai hruaitute inkawmhonaah chawhnu lama neihah chuan Pu Joseph Lalhimpuia chuan Mizo thalaite zingah Kohhran thalai pawlten huhang an nei lian hle tih sawiin thalai pual inkhawmna leh Khawmpui liante zirna leh eizawnna kawnga inkaihhruaina leh inzirtirna atana tun aia kan hman tangkai tha a tih thu a sawi a. MYC leh Kohhran thalaiten an tum ber chu thalaite hmasawnna anih angin tun aia kan thalaite sang zawka vawrh theihna tur kawng ngaihtuaha sawrkar hna sang ber thlenga kan thawh zel theihna tura Kohhran thalai pawl hrang hrangte nena thawhho a duh thu a sawi a ni.-DIPR
Post a Comment