~Tluangpuia Hilthang


Hmangaihna hian ramri a kham ngai lo tih hla sak ve nasat nak laiin, chhungten nupui i neih chuan Kolasib khua ngei neih tum la. Kolasib mi i hmu zo ngang lo a nih pawn Aizawl pel lo ni hram se an han tih zet chuan, nula inbox dawn pawn an khaw awmna lai Mizoram Map ah en a ngai ta fo mai. Pathian hmangaihna Agape lam a tui lutuk lo pawh hi, nula leh tlangval in hmangaihna Eros lam ah tal hi chuan kan lo tui phian hlawm zel a. Evi leh Adama atang tawh a, a kawp a awm tur a siam kan lo ni miau a. Chu hmangaihna rah chhuah a zar ah pumkhat ah in siam in, fanau malsawmna dawng in khawvel kan dap chhuak chu a ni ti tih tawh mai a.
mizo story story mizo
Ram a hran ang in tawng a lo hrang a, kan vun rawng thleng in a in ang lo ta nuai mai. Ram vawt lam a awm te an vun a var viau lai in, ram lum lam a chengte erawh an vun a dum tliang hlurh hlawm mai bawk a. Kan chenna hmun leh ram hian kan vun rawng a hril thui hle tih a chiang khawp mai. America khawmual pui an han hmu chhuak a. Vun dum kan tih ho te chu vun ngo kan tih ho chuan sal ah man in, an ram lam ah hnathawk tur in an hruai hlawm a. An duh loh tin reng thawh tir in, fu huan siamna hmun ah te an ruai lui a. Khawvel ram hrang hrang ah, an duh vang pawh ni lo awm darh tir an lo ni a.

Vun ngo ten vun hang ho sal ah an chhawr leh tih duhdah chu duh lo in, America President ropui ber Abraham Lincoln ah chuan an ram a mi dum sal awmte chu a lo chhuah zalen ta a. Midum kan tih te pawn chu zalenna nen, khawvel ramtin an dap chhuak ta. Keini India ram ngei ah pawh sawrkar in a buaipui ta viau hlawm chu a nih hi !

Keini hmarchhak kil a hnam in khar khip tak Mizo te pawh, Lal Isua pian atang a kum sanghnih an pelh meuh chuan khawvel kan dai dar ve ta viau mai. A bik takin kan Mipa te ai in Hmeichhe lam in, State pawn leh Ram pawn a hnathawh kan uar zawk mah a. An fel leh taimak vang a nih mai piah lam ah, ram dang a hnathawh tur hi hmeichhe lam hna a tam zawk vang a ni tel tho awm e. Spa leh House Maid a thawk a an chhungte tan a tangkai leh fel tak tak nula an awm ta nual mai.

Nula pum pa mi ram a han awm ta chu hmangaihna lipui in, an hnathawh lam a a man beh tak te pawh an awm ta nual mai. An lo tum lawk miah lo in hnamdang val tawn a uai a, khiangawi a awm hlen ta te pawh an awm bawk a. A then fa rawn hawn a, kan zotlang ram nuam chhawrpial run i iang e, rawn ti chho tur vun ngo leh dum pawh an awm ve ta nawk mai.

A tlangpui in vun ngo han nei ho hi chu kan ram ah an lo let lo tlangpui zawk a. An ram economy a hniam vang nge vun dum nei ho hi chu, an pasal te ram lam a han awm leh nei hlen an tam lo in a lang. Vun ngo nei kan ngaihsan vang pawh ni chuang lo in, vun dum lam in min chim hneh chho tan zawk dawn ni in a lang bawk a. Nakin a buaina kan tawh loh nan sawrkar leh YMA lam ten, kan hnam dan kan chian leh zual a pawimawh awm e.

Pathian in hnam tin hi duhtak a a siam vek kan ni a. Cheng ho a in pui tawn a, khawsa ho leh in hmangaih tawn tur kan ni. Chutih rual in chenna ramri te min siam sak a, kan tawng leh vun hmang in kan ram tur theuh min lo siam bawk a. Tumah intibuai lo a, kan ram theuh enkawl leh humhal tur a min din ni ngei in a lang.

Khawvel changkanna avanga ram khat ang mai a kan in awm pawlh tak avang in, kan hnam leh ram hi a ral tur a ni chuang lo. Chu vang chuan eng hnam pawh ni se, kan ram a a awm a nih chuan kan hnam leh sakhua hi a zah in a humhalh tlat tur a ni. Chutiang a awm thei lo chuan kan ram ah hian chan an nei tur a ni lo a. Kan en hran a kan en liam mai mai loh a tha khawp ang.

Kan hnampui ngei nupui pasal ah neih hi a him ber a. Kan awmna hmun leh eizawnna avang a hnamdang kan lo nei a nih pawh in, kan hnam leh sakhua a kan chhum hmin hi kan bat a ni tih te ka ngaihtuah a.

Kolasib khua ka hmuh loh pawn Aizawl pel loh hram chu in tum teh ang. Ka nula hmangaih in ramri a kham thei si lo a, ka ram leh hnam hmangaihna tal erawh chuan ramri kham hram teh se ka ti ta a.

Mizo Story -Times of Mizoram

Post a comment

Powered by Blogger.