SEDP hi NLUP ang mai maiin Kan kalpui dawn lo - Dr Thangtea
MNF party chuan nimin khan Chawngte-a MNF pisaah an party policy thar, Socio-Economic Development Policy (SEDP) hawnna leh zirhona an buatsaih a; MNF vice president Dr R Lalthangliana'n SEDP chungchang sawiin, "SEDP hi Congress-in NLUP an kalpui ang mai maiin kan kalpui ve dawn lo," a ti.
Dr R Lalthangliana chuan, "MNF kan sorkar chuan Assembly session neih hmasak berah SEDP kalpuina tur cheng vbc. 1500 aia tlem lo kan dah nghal dawn," a ti a; Mizoram mipui ei leh bara an intodelh theih nan te, ni tin khawsak a nawm zawk nante NLUP sem ang ni loin SEDP an kalpui dawn niin a sawi.
MNF sorkar laiin CADC huam chhungah hmasawnna hna an thawk nasa nia sawiin R Lalthangliana chuan, "Chawngte-ah lei pahnih kan dawh a, bank kan hawng a, PHC kha CHC-ah kan hlangkai a, building ṭha tak kan sa a, Longpuighat leh Radamon High School-te adhoc aided-ah kan hlangkai a, Kalamanagar College pawh sorkarin kan la a, Chhumkhum leh Chawngte inkar kan blacktop a ni," a ti.
MNF Vice President chuan, district council chhunga mipuiin harsatna an tawhte an ngaihthlak thu sawiin, "Kumin inthlana MNF-in sorkarna kan siam chuan district council hrang hrangah hmasawnna nasa zawk kan thawk leh dawn a ni," a ti a; MLA inthlan awm turah Congress sorkar chu paihthlakin an awm ngei dawn niin a sawi bawk.
MNF thuchhuah chuan, nimina Chawngte-a inkhawmah hian party hrang hrang aṭanga MNF zawm thar chhungkaw 719 aṭanga voter 2,111-te Dr R Lalthangliana'n MNF-ah a lawm lut niin a tarlang.-Vanglaini
Post a Comment