MPC President-in Danglamna thlentu siam turin Mizo mipuite a ngen

mpc president lalhmangaiha sailoMizoram People Conference (MPC) chuan an pisa chu kum 2018 atan nimin khan an hawng. MPC vice president Lalthansanga kaihhruai inkhawmah hian MPC president Lalhmangaiha Sailo-in thu a sawi a, kumina Mizoram in­thlanpui hmachhawn tur chu tihdanglamna thlentua siam turin Zoram mipui a ngen.

Lalhmangaiha Sailo chuan, Mizoram mipuite chu kum khat chhunga an sum dawn emaw, inthlan kum chhung ringawta sorkar thil tihte en lo a, term ruk (kum 30) kal ta chhunga sorkar tawhte rorelna leh an hnathawhte chhût chiang turin a ngen a, "Congress leh MNF party-te hian an manifesto leh mipui tana an tiamte an hlen em, tihte hi mipuite'n kan chîk leh zual a ngai a, party pahnihte hian inbumna mai mai an kalpui ṭhin em tihte kan hriat a pawi­mawh," a ti.

MPC President chuan, Congress leh MNF-te'n kum 30 chuang Mizoram an kaihruai tih sawiin, "Party pahnihte hi ram politics-te hi ro an rel dan leh min kaihhruai dan danglamna a awm teh chiam lo a, han sawi leh fakna tur hmuh tham an thlen lo ve ve a ni," a ti a; mipui an la rethei reng niin a sawi.

Lalhmangaiha chuan, Mizoram chu kum 30 chhung remna leh muanna hnuaiah a kal tawh chungin, mipui thlamuanna a awm tak tak em tih chu zawhna lian tak a nih thu a sawi a, "Remna ṭha chuan khua leh tuite tan hlimna, lungawina, thlamuanna, hmasawnna a thlen ṭhin a, mahse, vawiinah chuan Mizote hi kan thla a muang thei tlat lo. Kan teh­fung tur chu kan ram, hnam leh sakhua a him tur a ni, tih hi a ni," a ti.

MPC leh ZNP leh pawl dangte thawhhona, Zoram Peoples’ Movement (ZPM)-in Congress leh MNF paihthlak an tum rualin, Mizo mipui leh Mizoram tana thil ṭha, kumkhaw daih tur rela thawhchhuah chu an tum lian ber a nih thu sawiin Lalhmangaiha Sailo chuan, "ZPM-a thawkhote hi kan lungrualin kan inpumkhat ṭha a, keini chauh hi Congress leh MNF party thlak thei awmchhun kan ni," a ti a; Mizoram mipuite chu ZPM thlawp turin a sáwm a ni. 

Inkhawmah hian ZPM general secretary K Sapdanga pawhin thu sawiin, “Mizoram mipuite'n sorkar ding lai thlak an duh tih hi chu a lang chiang tawh a, a thlakna tur atan hmana mite tho kha koh kir leh tur nge, mi thar, tha thar koh chhuah tur tih an bûk mek a, ZPM hi kan ṭanrual ṭhat phawt chuan min nghak a ni," a ti a; mipui lam an inpeih a, ZPM-te pawh an inpeih ve a ngaih thu a sawi. -Vanglaini

Post a comment

Powered by Blogger.