Kumin aṭangin M/S-te English medium-a kalpui vek a ni tawh dawn - Education Minister
Electric Veng Middle School, Aizawl chuan nimin khan Electric Veng YMA HAll-ah an kum 50-na, golden jubilee an lawm a; an hun hmanpuitu School Education minister H Rohluna chuan, kumin aṭangin Mizorama middle school-te chu English medium-a kalpui vek a nih tawh tur thu a sawi.
School Education Minister chuan, ram hmasawnna atan zirna chu thil pawimawh em em, thlahthlam thiang lo a nih thu sawiin, "Sum harsa tak chung pawhin sorkarin zirna hmasawnna tur a nih chuan theihtawpa hma a la zel a. Tun dinhmunah middle school leh a hnuai lam chuan NCERT textbook an hmang vek tawh a, kumin aṭangin middle school-te English medium-a kalpui vek a ni tawh ang," a ti.
Sorkar sikul ṭhat leh ṭhat loh chungchangah headmaster-te leh zirtirtute an pawimawh thu sawiin H Rohluna chuan, "Zirtirtu ṭha tak tak, la ṭhalai zawkte headmaster an nih ve theihna turin headmaster recruitment rules siamṭhat a ni," a ti a; headmaster atan sanction post-a a chanve chu promotion a ni ang a, a chanve dang chu exam (LDE) aṭanga kaisan theih a nih tawh thu a sawi.
School Education Minister hian golden jubilee lawmpuina atan Electric Veng M/S hnenah hian computer a pe a ni.
Jubilee lawmnaah hian bialtu MLA, minister Lal Thanzara chu khualzahawm a ni a; Lal Thanzara chuan, Electric Veng M/S-in kum 50 chhunga naupangte hnena zirna ṭha pe a, ram leh hnam tana mi ṭangkai leh mithiam a lo chher chhuak ṭhin chu lawmawm a tih thu sawiin, "Thlen china duh tâwk mai lo a, tun aia nasa lehzuala ṭan la a, zirlai leh zirtirtute thawhrah chhuanawm tak hmuh tur a awm zel ka beisei," a ti.
Electric Veng M/S hi kum 1968-ah headmaster leh zirtirtu pathum neiin din a ni a, tunah hian zirlai 76 leh zirtirtu 13 an awm a ni.-Vanglaini
Post a Comment