Rannung seh natna veia inringhlel Phullenah enfiah tur an la awm reng
November 2017 aṭanga Phullen khuaa rannung seh natna (scrub typhus) lêng chu tun thlengin mi 70 chuangin an vei tih hmuh chhuah a ni tawh a; inringhlela inenfiahtir tur la awm reng mah se, tun kar bikah chuan a vei hmuh chhuah belh an awm tawh lo nia thu dawn a ni.
Tarlan tawh angin, Phullenah hian January 6, 2018 khan mi 12 endik zinga pakhatin rannung seh natna a vei tih hmuh chhuah a ni a, January 5 khan mi 72 endik zinga pariatin an vei tih hmuh chhuah a ni.
November 2017 thlaah mi 17 endik zinga mi 14-in an vei a, December 2017 chhungin mi 51 endik zinga mi 47-in an vei tih hmuh chhuah a ni bawk. Phullena scrub typhus vei inringhlel endik tawh chu mi 150 chuang an ni a, mi 70 chuangin an vei tawh a ni.
Phullen damdawi-ina medical officer Dr Zoliankimi Ngente chuan Vanglaini palai zawhna chhangin, tun hnai ni hnih/thum chhung bikah chuan scrub typhus vei hmuh chhuah an awm loh thu a sawi a; chutih rualin, enfiah tur an la awm ve reng thu leh vawiin lamah chuan endik tur an awm leh nual a rinawm thu a sawi bawk.
Dr Zoliankimi Ngente chuan, rannung seh natna veite hi damdawi-inah enkawl an ngai lo a, anmahni inah enkawl an nih thu a lo sawi tawh a ni.
Phullenah hian rannung seh natna vang hian nikum December thla tâwp lam khan mi pakhat a thi tawh bawk. -Vanglaini
Post a Comment