TOURISM MINISTER-IN ROPEWAY LEH SKYWALK HMUN TURTE TLAWH

ROPEWAY AND SKYWALK IN MIZORAMROPEWAY AND SKYWALK IN MIZORAM: Nimin 19.01.2018 khan Tourism Minister Pu John Rotluangliana chuan KV Multipurpose School, Durtlang bula 'Ropeway' Cable Car landing station hmun tur leh Sihphir leh Lungdai inkar ram Sakawrhmuituai tlang-a 'Skywalk' siamna tur hmunte a tlawh a; Minister hi Dy Speaker leh Bialtu MLA Pu R. Lalrinawma, Tourism Director Pu Biakthanmawia Pautu, Tourist Officers Pi Rachel leh Pi R. Lalrinchhani bakah heng tourist hmun siamtu tur Leading Edge Pvt Ltd.,New Delhi atanga lo kal Captain Satish Pathania leh Company Consultant-te leh VC/khawtlang hruaitute’n an tawiawm a ni.



Minister chuan ramchhung leh pawn khualzinte hipna tura Tourism Department hmalaknate hi sorkar laipuiin a phurpui hle a, a siamna tur sum cheng vaibelchhe 99 sanction a ni a, 1st leh 2nd installment pawh dawn fel tawh a ni, a ti. Mizoramah fur a rei thin avangin hnathawh theih hunchhung a rei lova, a siamtu tur Leading Edge hotute lo kal hnenah a rang thei ang bera hna tan turin a hrilh. Ramchhung leh rampawna mite Mizoram lo zin thin mahse kalna tur an hriat vak ngai loh thu sawiin Minister chuan Durtlang-Tourist Lodge, Chaltlang inkarah thlunzawm tur Ropeway chu Asia-a sei ber tur a ni dawn a, Sakawrhmuituaitlang-a Skywalk tur phei chu India rama hmasa ber a ni dawn avangin tourist tam tak a hip thei dawn a ni, a ti.


Sihphir leh Lunglei VC leh khawtlang hruaituten Skywalk project hlawhtlinna tura phal taka ram an pek bakah theihtawpin sorkar hmalakna an thlawpna chungah Bialtu MLA Pu R. Lalrinawma chuan lawmthu sawiin helai bialchhung mipui tam takte tan eizawnna ngelnghet a siam sak dawn nghe nghe a ni,  a ti.
Tourism Director Pu Biakthanmawia Pautu chuan Skywalk hmunah hian mountain biking, nature walk, restaurant, dawr chi hrang hrangte pawh siam zel tum a nih bakah lirthei parking-na tur pawh felfai taka ruahman tum a ni tih a sawi a. Skywalk hi India ramah pawh a hmasa ber tur a nih avangin Mizote ngei pawhin an hlutin an tlawh chak ber hmun a nih thuai a beisei thu a sawi.-DIPR

Post a Comment

Powered by Blogger.