Australia Ramah Kal Tumte Tana Chhiar Ngei Ngei Chi - MIZO SOCIETY OF AUSTRALIA THUCHHUAH - TIMES OF MIZORAM

Breaking

Home Top Ad

Post Top Ad

Australia Ramah Kal Tumte Tana Chhiar Ngei Ngei Chi - MIZO SOCIETY OF AUSTRALIA THUCHHUAH

AUSTRALIA RAMA HNATHAWH CHUNGCHANGA MIZO SOCIETY OF AUSTRALIA THUCHHUAH

MIZO SOCIETY OF AUSTRALIA THUCHHUAH

A hmasain Mizoram leh ram hrang hranga kan unau zawng zawngte Mizo Society of Australia hmingin kum thar chibai kan buk vek a che u.


Kar hmasa zirtawpnia Mizoram Youth Commission Chairman Pu Joseph Lalhimpuia leh Sydney-a Consul General of India nilai Pu B.Vanlalvawna te inkawmna kha chanchinthar puan atangin kan lo hria a, India sorkar hriatpuina hnuaia Mizo thalai te tana ram pawna hnathawh theih dan tur kawng an sawidun te kan lo hriatin a lawmawm kan ti hle. Australia rama nurse hnathawh chungchang an sawi phei kha chu a thawk thei tur ten in rawn ngaihvenzui kan duhsak takzet a che u.

Mizo Society of Australia chuan Mizo thalai hna zawng mekte hi an remchan ang zela khawvel hmun hrang hranga inzarpharha eizawnna tha leh nghet tak an hmuh theih kan duhsak a. Amaherawhchu, ram danga hnathawh hi harsatna lian tak tak tawh theihna te leh buma awm theihna te a nih avangin Mizo thalaiten fimkhurnana kan hman theihnan Australia rama hnathawh chungchanga hriat tur pawimawh nia kan ngaih thenkhat kan rawn tarlang e.

Australia rama lehkhazir leh hnathawk tura kal tumte lo buaipui tur hian Education Agent leh Migration Agent an awm thin a. Chu'ng agent te chu sumdawng an ni. Zirna lam chauh thila buaipui leh thurawn pe thin te hi Education Agent an ni a, qualification nei emaw sorkara in register kher an nih a ngai lo. Amaherawhchu university emaw college ten rintlaka an ngaih ho chu Qualified Education Agent Counsellors (QEACs) an ni tlangpui a. A nazawng an hmang ngai lova ngaih a ni.

MIZO SOCIETY OF AUSTRALIA THUCHHUAH
Hnathawhna lam rawngkai leh visa kaihhnawih reng renga thurawn pea buaipuitute hi Migration Agent an ni a. He'ng agent te erawh hi chu Australia sorkar department pakhat Home Affairs Department hnuaia Migration Agents Registration Authority (MARA) office-a in register an nih vek a ngai thung a, MARA-in a register te chauh lo chu Migration Agent anga sumdawn phal an ni lo. Migration Agent te hi Education Agent an ni kawp thei a, Education Agent te erawh hi chu Migration Agent an ni kher lo thei a ni.


MARA website ah hian tute nge agent nia, tute nge sorkar blacklist-a awm tarlan a ni. https://www.mara.gov.au/

Tun hnaiah Mizo company/consultancy/agency thenkhatin Australia rama hnathawh theihna tiin advertisement mi hip thei tak tak an chhuah thenkhat internet kaltlangin kan lo hmu a. Chu’ng te chu rintlak an nih leh nih loh te hriat tumin kan theih ang angin kan lo zirchiang ve a, kan thil hmuh thenkhat kan rawn tarlang duh a ni:

1) July 18, 2017 khan Aizawl Venglaiah Manpower Resources Management chu hawn a ni a, an thawhpui nia an sawi "SD Education Australia" hian Education Consultant atan David Ong-a an hmang a. Migration Agent a nih hriat a nih loh avangin zirna baka thurawn pe thei a ni lova, chanchinbu pakhata a inziah dan "visa hi thalai lehkhathiamte tana Australia rama hna zawnsaktu tur" tih hi SD Education Australia kaltlang chuan dan anga tih theih a ni lo a, visa buaipui leh hna zawnsak tura Migration Agent thawhpui (partner) an nei a nih loh chuan Manpower Resources Management leh SD Education Australia hian dan angin Australia ramah Mizo thalai te tan hna an zawnsak thiang lo a ni.

2) R&M Job Centre, Zarkawt, Aizawl ami chuan Australia rama hnathawh theihna "mi taima leh mi rinawm tan hna tha tak offer" a nih thu a tarlang bawk a. An advertisement ah hian pawl 10 pass chin tan farm hnathawk thla 1-a Rs.250000 hlawh theihna te, BSc nursing degree nei tana thla 1-a Rs.350000 hlawh theihna te a ni hlawm a ni.

R&M Job Centre hi Australia rama an thawhpui (partner) tute nge an nih tih zawh an nihin "personal information" a nih avanga an chhan theih loh thu an sawi. Tin, hetianga India pawisaa an hlawh theihzat sum tam tham tak tak tarlan a nih hian Australia rama khawsakna man sawi tel a nih loh chuan thil awmdan dik tak inhrilhhriatlohna a ni a, thenkhat tan chuan inbumna pawh a tih theih awm e.

3) Destiny Consultancy, Millenium Centre, Aizawl pawhin Australia ramah hna tam tak thawh theihna awm angin an inzuar a. Hillsgate chanchinbu-in a zawhchian chuan an insawi dan ang a lo ni chiah lo tih te hmuhchhuah a ni.
He'ng agency te leh a dang te pawh hian sumdawng an nih angin fee engemawzat an la thin a. Helama zirna leh hnathawh tur an tiam ang hi, a theihloh tawp chu ni lovin, a taka chang tur chuan a kawng a thuiin a bumboh thei hle tih hriat a pawimawh a ni. Thil nihna (ground reality) hre lemlo te hnenah a beiseiawm thei ang bera pholan niin harsatna awm thei leh kawng thui tak zawh tur awm ang te chu hrilh an ni thin lovah kan ngai a, over promise leh under deliver an tih ang hi ni berin a lang.

Tin, Australia ramah hian ram dang atanga hetianga rawn lut, sorkarin a phal loh anga hlawh tlem te te pe lo chhawr thin an awm a. Chu'ng ho dinhmun chu a buaithlak thin hle. A bikin mi an damlohin harsatna namenlo tawh theihna a ni a. Sum tam tak sen ngaihna te a nih theih avangin fimkhur a tul hle. Dan lova hnathawk leh a bikin visa neilo emaw visa thi tawh te hi sorkarin a man chhuah chuan thawn haw theih an ni a, sorkar blacklist ah awmin Australia ram luh leh lawk theih lohna te a ni thei a ni.

Australia ram hi pemkhawmte ram a ni a. Inthliarna awm em em lovin thawkrim duh te tan chu career tha tak neih theihna a ni. Amaherawhchu, sorkar hi a fimkhurin a khirh sawt hle a. Lehkhazir tur emaw hnathawk tura kal tum tan Home Affairs Department website-a an tarlan te https://www.homeaffairs.gov.au/, Delhi lama Australian High Commission website-a inziak te http://india.highcommission.gov.au/ leh immigration leh education chungchanga thil hriat tur pawimawh internet-a chhiar tur tam tak awm te zirchiang hmasa turin kan inngenin kan inhriattir duh a ni.

Nurse hnathawk tur te tan bik chuan Australia ram puma healthcare professional 10 te registration siamsak theitu Australian Health Practitioner Regulation Agency hi hmelhriat a ngai a. An website https://www.ahpra.gov.au/ ah hian hriat tur tul leh anmahni biakpawh theihna te a awm a ni.


A tulah chuan kan theih chinah inpuih kan inhuam reng a, amaherawhchu ngaihtuah chian loh leh fimkhur tawk loh avanga tihsual palh a hlauhawmzia te hrenawn leh turin kan Mizo pui te kan chah duh che u a ni. Thil awm dan chiang taka zir lawk chungin helama zirna emaw hnathawhna tur ngaihven thei te chuan ngaihven zui turin kan ngenin kan sawm duh bawk che u a ni e.
MIZO SOCIETY OF AUSTRALIA THUCHHUAH
Sd/-
Joseph Lalnuntluanga 
President

Sd/-
Pypye Lalenpuii
Secretary

Jan 19, 2018
Mizo Society of Australia,
Melbourne, Victoria

Post Bottom Ad