Pu C Laltlanthanga, Associate Executive Member, Indian Olympic Association (IOA)

Pu C Laltlanthanga, Associate Executive Member, Indian Olympic Association (IOA) Mizo Tana Olympics Kawng Sial Thei Tur

"Officer zinga sap tawng thiam lo ber ni mah ila, Mizote tan huaisen takin ka pen chhuak," Pu Tlana

Pu C Laltlanthanga, Republic Veng chuan Mizote tan infiamna kawngah mellung phunin, Indian Olympic Association (IOA) committee sang berah a thu dawn a, Associate Executive Member-ah ruat niin Mizo zinga hmasa ber leh awm chhun a ni.

December 14 khan IOA Bhavan, Delhi-ah hruaitu thar thlan a ni a, Mizoram State Sports Council Secretary leh Mizoram State Olympic Assosiation Secretary General ni lai Pu Tlana chuan member 10 tlin theihna Executive Council a chuh.

"Officer zinga sap tawng thiam lo ber ni mah ila, Mizote tan huaisen takin ka pen chhuak," tiin a sawi a, "Mizo zinga tute mahin chuh enah pawh an en ngai lo va, kei chuan kan harsatna sutkian a nih theih nan chuh ngei ka tum tlat a ni," a ti bawk.

Mizo zinga Indian Olympic inthlana chuh hmasa ber a ni nghal a, tling zo lo mah se committee sang bera thu thei tur Associate Executive member pahnih an ruat belh zingah tel zuiin, Mizoram infiamna tan hlawhtlinna peng pawimawh tak pakhat a tling.

IOA inthlanah hian Indian Olympic pawmpui national federation hrang hrangin vote thum theuh neiin, state hrang hrangin vote hnih leh union territory hrang hrangin vote khat zel an nei a, vote 197 a awm.

Pu C Laltlanthanga, Associate Executive Member, Indian Olympic Association (IOA) 

India rama infiamna khaikhawmtu lian bera hruaitu thiltithei thlan zinga tel tumin a vawi khat nan a chuh a, a bangbo hle tih a sawi. Tling zo lo mah se committee sang bera thu tur ruat zingah a tel phah tih a pawm bawk.

President, Senior Vice President, Secretary General leh Treasurer pakhat theuh bakah Vice President pariat leh Joint Secretary paruk an awm a, anni bakah hian Executive member thlan chhuah 10 leh ruat pahnih awm bawkin 2021 thleng, kum li chhung hruaitu an ni dawn a ni.

Pu Tlana chuan inthlan a chuh chhan sawiin : "2016 Rio Olympics-a thil thleng vangin Indian Olympic hruaitu pawimawh zinga tel ve ngei a tul ka ti hle. India hockey squad-ah Lalruatfeli a tel theih nan theihtawp chhuahin hma kan la a, nihna eng mah neih loh chuan chet a har em em tih a takin ka tawng," a ti.

Sawi belhin : "Mizorama sports association hruaitute hnenah national-a hruaitu ni turin ka fuih fo thin. Chutih laiin entawn tura ka awm theih nan keimah ngei ka pen chhuah a tul niin ka hria.

"Associate Executive member ka nih hun chhung la rei lo hle mah se IOA hruaitu lawkten Mizoram min thir dan a dangam nghal tih ka hria a, Mizoram rawn tlawh an chak tawh tlat a ni," a ti.