MHIP Branch 21 awmna Tuipuiral Block MHIP Conference vawi 22-na Khawbung Community Hall-a hman mêk chu Bialtu MLA Pu T Sangkunga’n khuallian niin a hmanpui.

Bilatu MLA t sangkungaThuchah sawiin khuallian Pu T Sangkunga chuan Tuipuiral chu RD Block pakhat, Constituency pakhat, Kohhran leh NGO pawl hrang hrangte hlawm khata awm an nih avangin mihring an inpawhin chhungkhat ang maiin an khawsaho a, he inpumkhatna hi chhawm nun zel atana thil tha tak a nih thu a sawi a. Tuipuiral chu Pastor leh lehkhathiam leh sawrkar mi pawimawh tak tak chhuah thinna a nih tawh thu sawiin, hun engemaw chen atang khan zirna lamah a hnu fualin inkalpawhna kawng pui a that loh avangtein Tuipuiral mipuite pawhin thliarkar rilru, ngaihsak lo nia inhriatna lian tak an nei nia a hriat thu leh, tunhnaia hmasawnna hrang hrang thleng mek chu lawmawm a tih thu a sawi a. A bikin khaw inkalpawhna tur kawngpui thahnem tak PMGSY hmanga metal tur leh laih tura hna thawh mek a nih dante tarlangin, zirna lama bial chung hnufualna pawh a theih ang anga NGO te nen pawha hma lâkho a duh thu a sawi bawk. 


East Tuipui Bialtu MLA Pu T Sangkunga chuan zirnaa bial chhung tlak hniamna chhan zingah English Medium awm lo leh zirlaite’n English—a harsatna an neih chu nia a ngaih thu sawiin khawtlang thawhhona nena English Medium din mek a nih dan leh School building pawh MLA fund leh sawrkar tanpuina dang dang dapa hmalak mek a nih dante sawiin, heng English medium-ahte hian zirtirtu tha zawk an hmuh theih nan zirtirtu pakhat zel rawihna tur ngaihtuah a tum thu a sawi a. Zirna lama hmasawn tur chuan chhungkaw nu ber an pawimawh hle nia sawiin vawiina Block MHIP member kal khawmte pawh an fate nun hloh leh hloh loh chungchangah mawhphurhna sang tak an nei a ni’ a ti bawk.

MHIP General Hqrts President Pi Saipuiin Bialtu MLA-in Tuipuirala MHIP Branch hrang hrang run sakna tur a pek thin avangin MHIP Gen Hqrts hmingin lawm thu a sawi a, kum puan thupui “Hmeichhia leh naupangte hmasawnna leh himna atana nasa taka tan lâk” tih hmangin thuchah a sawi a. Kum puan kaihhnawi -  Advocate Sylvie Z. Ralte te, Pi V.Vanlalruati leh Pi Laldinpuii te thuziak sem nghal a ni bawk.

Block MHIP Conference hi MHIP General Hqrts, Champhai Sub Hqrts, Tuipuiral Group YMA leh Tuipuiral Zirlai Pawl hruaitute’n an tawiawm a ni.

Vawiina Tuipuiral Block MHIP Conference Vantlang Inkhawm hi President Pi Lalrochhari Sailo-in a kaihruai a, UPC (NE) Pastor C. Lalmalsawma’n member boral tawhte sûnna hun a hmang.

Block MHIP Conference hi nimin atanga hman tan niin Khawbung Information Centre-ah Palai rorel inkhawm neih a ni a. Zan lamah Pailai lawm inkhawm atan hun hman niin vawiin lamah vantlang inkhawm buatsaih a ni. Chawhnu leh zan lamah Champhai Forest Division atangin Pu Rochhuma leh Khawbung WATSAN Sub-Division PHE Department atangin Er. C Lalchawimawia te’n awareness campaign an nei ang. Naktukah volleyball leh hnam lam hmangin Branch hrang hrangte an intihsiak bawk ang. -DIPR

Post a Comment

Powered by Blogger.