India Leh Brazil-ah WhatsApp for Business Kalpui

Khawvela thu inthawn kualna application lian ber WhatsApp chuan India leh Brazil ramahte WhatsApp for Business application an tlangzarh dawn a, India bikah hi chuan Flipkart chuan an kalpui ṭan der tawh. 

Facebook hnuaia awm Whatsapp chuan WhatsApp for Business application tlangzarh tur hi tun hnai khan an puang a, engkim peihfel a nih tawh thu an sawi. Company thuchhuah chuan, "India leh Brazil te hi kan sumdawnna hmun lian ber ram pahnih an ni mek a, heng hmunah te hian sumdawnna kawnga huang zauh turin WhatsApp for Business application hi tlangzarh a ni dawn a ni" tiin an tarlang. Tun kar chhung hian India-ah chuan official-a tlangzarh hman beisei a ni a, hemi atan hian kum kalta aṭang khan Make my Trip leh Book My Show te chu buaipui ṭan a lo ni tawh. 


WhatsApp for Business application hmang hian customer-te chuan Flipkart hnuaia awm Myntra aṭangin WhatsApp kaltlangin confirmation message an dawng a ni. Myntra chuan customer te thil order chu an lo hmu ngei a ni tih hriat nan, an thil chah leh a man zat an thawn nghal zel tawh a, hei hi tunah pawh an kalpui ṭan der tawh. 

WhatsApp for Business application hi Android-ah chauh a hman theih a, download a, install mai tur a ni. Hei hi US, UK, Italy, Indonesia leh Mexico-ahte pawh kalpui a lo ni tawh bawk. -Vanglaini

Post a comment

Powered by Blogger.