YOUNG MIZO ASSOCIATION, SIHPHIR BRANCH PRESS RELEASE

Dt. 25.1.2018 zan dar 8.30 khan Sihphir Branch YMA Emergency Meeting neih a ni a, hetiang hian Press Release siam a ni.

YOUNG MIZO ASSOCIATION, SIHPHIR BRANCH

PRESS RELEASE No. 1 of 2018

Young Mizo Association, Sihphir Branch chuan kan member pui Pu Lalbiakzuala s/o H.V. Lalnuntluanga, Sihphir dt. 22.1.2018 (Thawhtanni) zan a Mizoram Chief Minister Escort Party Kolasib kal haw lam ten, 207 motor a thingzai tlawn 50 a phur haw lam chu Serkhan khaw chhung Nisapui/Bagha road peng atanga Aizawl lam kawng chho ulh laiah um pha in kilometer chanve (0.5km) vel bawr kawng a ken lawk loh vang a nunrawng taka sawisa a, thichhawng a an kalsan hi pawi kan tiin kan dem tak zet a; mipuite rawngbawl tura lak, dan leh hrai engkim hre tura ngaih Mizoram Chief Minister meuh vengtu Police te hetianga nunrawng taka an che ta mai hi hriatthiam harsa kan tiin tun hnuah hetiang hi thleng tawh lo se kan duh hle a ni.

Pu Lalbiakzuala hi mahni pawha che tha hlei thei lo leh zun pawh zung thei lovin tunah hian Synod Hospital, Durtlangah enkawl mek a ni a. Hetianga Police-te kutthlak vanga chhungkaw pa ber leh an eizawngtu ber damdawi ina a awm mek lai a dt. 24.1.2018 (Nilaini) a MPCC Media Department ten Press Conference a Press mite zawhna an chhan naah Chief Minister Escort Party ten Pu Lalbiakzuala kutthlak miah lo anga an sawi hi Sihphir Branch YMA chuan pawi kan tiin, hetiang thu dik tawk lo hmanga insawifiah leh mipui rilru hruai kawih an tum hi kan ngai thutak hle a, tun hnuah thudik tawklo hmanga thu thehdarh tawh lo turin kan ngen a ni.

Sihphir Branch YMA chuan dt. 31.1.2018 (Nilaini) ral hma ngeiin Pu Lalbiakzuala kutthlaktu te hi man a, an phu tawk hremna pe ngei tur leh a in enkawlna senso bakah zangnadawmna pe ngei turin Mizoram Sorkar kan phut tlat bawk a ni. Chutih rual chuan Pu Lalbiakzuala’n kawng a tet leh that tawk loh vang a Chief Minister Escort Party kawng a lo kian lawk lo erawh pawi kan ti tak zet a, ngaihdam leh hriatthiam a tulna apiangah kan member a nih angin Sihphir Branch YMA chuan ngaihdam leh hriatthiamna kan ngen e.

Tun hnuah hetiang thil a thlen tawh loh nan, Police-te leh ram hruaitute pawh hma la turin kan phut a. Kan member pui Pu Lalbiakzuala hi a tawp thlengin a dikna chanvo a hmuh ngei theih nan thlawp tlat kan tum thu Mizoram mipuite hriatah kan puang e.

Sd/-

R. Lalduhzuala

President

Sihphir Branch YMA

Sd/-

H. Lalrawngbawla

Secretary

Sihphir Branch YMA