Zo Reunification Organisation (ZoRO) Vawiin chawhma khan Lal Thanhawla Auditorium-ah Chin-Lushai Conference 126th Anniversary lawmna neih niin  Zo Reunification Organisation (ZoRO) Gen. Headquarters buatsaih a ni a. Home Minister Pu R. Lalzirliana chu Khuallian niin MZP President Pu L. Ramdinliana leh MSU President Pu R.B. Lalmalsawma chu Khualzahawm an ni.

Khuallian Pu R. Lalzirliana chuan zofate insuihkhawm tura thahnemngaihna rilru nei a, hemi atana hma la tute kan hre reng a ni tiin ZoRO hian hnam inpumkhatna tha zawk kan neih theih nan nasa takin an thawk a, United Nations thlengin hnam tan hma an la a ni, a ti a. Zofate hi ram inrelbawlna avangin India, Bangladesh leh Myanmar-ahte then darhin kan awm a, India ram chhungah pawh state hrang hrangah kan awm darh mek zel a, then darha kan awm avang hian zawi zawiin kan rilru pawh a lo hrang tial tial niin a lang, a ti a. Minister chuan zofate chu tlang leh mual hranah kan cheng a, kan tawngte pawh kan inhre tawn lutuk ta lova, unau ni chungin ramri leh khawsak kawng inan loh avangin kan inkungkaihna leh inlaichinna pawh a dal zel a ni, a ti a. Thangtharte phei chuan unau kan nihna pawh hi an man thiamlo zel ang tih a hlauhawm hle a ni, a ti a. Mizoram hi zofate inpui ni tura kan buatsaih mek lai hian a chhunga chengte pawhin rilru inhawng taka inpumkhatna leh inunauna tinghet zel tura tan lak a tul a ni, a ti a.


Home Minister chuan mizo hnam kan nihna hian ramri a kan a ngai a, tlang hranga cheng kan nihna avang hian kan rilru pawhin ramri a kan ve a ngai a ni, tiin inngaihdamna atangin kan inunauna hi kan siam tha theiin a rinawm a ni, a ti a. Hnam ropui leh changkang apiangin hnama chian pawimawhna an hrechhuak thar zel a, an chawr chhuahna hnam nun theihnghilh lo turin sum leh tha pawh an seng hreh ngailo a ni, a ti a. Hnam hian nihna (identity) a ken tel tlat avangin hnamah  kan chian a tul a, mahni hnam aia hnamdang zia ngaisang zawkte nun hi a awhawm loh a ni, a ti a.  Kan hnam dinchhuahna atana tha thawhtute hlutna theihnghilh lovin hnam dang karah kan hnam zia chhuanawm tak tak pholang zel ang u tiin kalkhawmte chu a fuih a ni.

ZoRO President Pu R. Sangkawia chuan thu sawiin thalai rual ten zofate dinhmun chiang takin kan hriat a pawimawh a ni, a ti a. Chin-Lushai Conference hmasa ber chu January Ni 29, 1892 khan sipai hmunpui Fort William-ah neih a lo ni tawh thu a sawi a. ZoRO hmalakna hrang hrang leh an hnathawhte bakah an hmachhawpte a tarlang bawk a ni.

Programme hi ZoRO Vice President Pu Rohmingthanga Kawlni in a kaihruai a. ZoRO General Secretary Pu R. Lalchhuana atangin report ngaihthlak a ni a. Chawhnu lamah function hi chhunzawm leh a ni. Naktuk February Ni 1, 2018 hian MZP Conference Hall-ah ZoRO rorel inkhawm neih a ni dawn bawk a ni.-DIPR

Post a comment

Powered by Blogger.