Chief Minister vengtute'n January 22, 2018 zana Serkhan khuaa Lalbiakzuala, Sihphir kut an thlak chungchangah Mizoram Police-te leh Lalbiakzuala chhungte chu January 29, Thawh-
ṭanni tlai khan an inrem a; Lalbiakzuala chhungte'n police-a FIR an thehluh tawh pawh an hnûkdâwk nghal.
Inremna siam tura kal IGP Zorammawia chuan Vanglaini palai zawhna chhangin, Lalbiakzuala chhungte nen ṭha taka an inbiak theih thu a sawi a, "Pathian hmingin ṭha takin an inngaidam thei a. Inremna siam a nih tâkah chuan thubuai awm pawh ûmzui tawh loh mai turin kan ti a ni," a ti.
Zorammawia chuan, Lalbiakzuala enkawlna senso atan a chhungte hnenah Rs. 50,000 hlan a nih thu sawiin, "Hei hian inenkawlna senso a daih loh chuan a ṭul angin ngaihtuah leh tur a ni a, an hmang bâng a nih pawhin sorkara kîr leh kher a ṭul tawh loh thu kan hrilh," a ti a; chu bak chu inremna turin thudah dang a awm loh thu a sawi.
Lalbiakzuala nupuiin a pasal chu eizawngtu ber a nih avangin, hna thawk thei loa a awm reng chuan chhungkaw khawsak a buaithlak tur thu a sawi tih sawiin IGP chuan, "Hna thawk thei loa hun eng emaw chen a awm a nih chuan a ṭul anga ngaihtuah leh theih zel turah ka ngai," a ti.
IGP chuan, Lalbiakzuala chhungte hnen aṭanga thu a dawn dan chuan, Lalbiakzuala hi nimin khan damdawi-in aṭanga chhuah a ni dawn a, a hnung ná a la tih bakah, zun lamah pawh harsatna a la nei a ni.
Lalbiakzuala pu, Laibata, Sihphir Venglai chuan thuchhuah siamin, an tupa Lalbiakzuala leh Chief Minister vengtute inhmuhthiam loh vanga kut inthlakna thlengah Mizoram Police-te nen inremna an siam thu a tarlang a, "Kan thiam lohna leh dik tâwk lohna ve veah inngaidam tawnin, Pathian hmingin kan inrem tih mipui hriatah kan puang a, FIR pawh kan hnûkdâwk nghal ve ve a ni," a ti.
Laibata chuan, tun hnuah an thil tawn chungchang chu sawizui ni tawh lo se a duh thu tarlangin, "Politics-a inchirhtheh nan phei chuan hmang lo turin mi tin kan ngen a ni," a ti a; an thil tawn chungchanga a ṭul ang anga buaipuitute hnenah lawmthu a sawi bawk. -Vanglaini
Post a Comment