timesofmizoramVawiin chawhma khan Chanmari YMA Hall-ah 1st Zofa Global Convention neih niin Home Minister, Pu R. Lalzirliana chu Khuallian a ni a. Zofa Global Network (ZGN) buatsaih a ni.

Khuallian Pu R. Lalzirliana chuan ZGN hian nasa takin hnam insuihkhawmna turin an thawk a ni, tiin zo hnam chi hrang hrang te unau kan nih hi kan theihnghilh loh a pawimawh a ni, a ti a. Zofate hi kan ram inrelbawlna avangin India, Bangladesh leh Myanmar-ahte then darhin kan awm a, India ram chhungah pawh state hrang hrangah kan awm darh mek zel a, then darha kan awm avang hian zawi zawiin kan rilru pawh a lo hrang tial tial niin a lang, a ti a.

Minister chuan zofate chu tlang leh mual hranah kan cheng a, kan tawngte pawh kan inhre tawn lutuk ta lova, unau ni chungin ramri leh khawsak kawng inan loh avangin kan inkungkaihna leh inlaichinna pawh a dal tial tial a ni, a ti a. Thangtharte phei chuan unau kan nihna pawh hi an man thiamlo zel ang tih a hlauhawm hle a ni, a ti a. Mizoram hi zofate inpui ni tura kan buatsaih mek lai hian a chhunga chengte pawhin rilru inhawng taka inpumkhatna leh inunauna tinghet zel tura tan lak a tul a ni, a ti a.

Home Minister chuan mizo hnama kan chianna hian ramri a kan a ngai a, tlang hranga cheng kan nihna avang hian kan rilru pawhin ramri a kan ve a ngai a ni, tiin inngaihdamna atangin kan inunauna hi kan siam tha theiin a rinawm a ni, a ti a. Hnam ropui leh changkang apiangin hnama chian pawimawhna an hrechhuak thar zel a, an chawr chhuahna hnam nun theihnghilh lo turin sum leh tha pawh an seng hreh ngailo a ni, a ti a. Kan awmna tlang hrang hrang atang hian thinlung hmun khat kan put theih nan tan i la zel ang u tiin kalkhawmte chu a chah a ni.

 ZGN Chairman Pu Sangzela Tlau chuan zofate unau kan nihna sawh nghet tur leh a aia nasa zawka inpumkhat turin Zofa Global Network (ZGN) chuan tan a la zel dawn a ni, a ti a. Kan theih ang tawkin inunauna tha neih kan tum tur a ni tiin kalkhawmte chu a fuih a ni.

Zofa Global Network (ZGN) hi July Ni 2, 2013 khan din a ni a. ZGN thupui chu ‘Unau kan ni’ tih a ni. ZGN tum ber chu khawvel hmun hrang hrang a awm zofate nasa lehzuala insuihkhawm bakah intanpuia inngaihsak tawn a ni. ZGN General Hqtr chu Aizawlah awmin Sub-Headquater chu Tahan, Myanmar-ah an nei a. Kum 2014 khan Zokhawtharah ‘Zofa Global Unity Festival’ hlawhtling takin neih a lo ni tawh a. Zofa Global Unity Badminton Championship 2018 chu February 14-16 hian neih a ni mek bawk a ni.  

Programme hi session 3 a then a ni a. 1st Session hi ZGN Vice Chairman Pu C. Dinthanga chuan a kaihruai a. Kalkhawmte lawmna thu ZGN Vice Chairman Pu C. Lalrambuatsaiha chuan a sawi a. ZGN General Secretary Pu James Ramdinmawia atangin report ngaihthlak a ni a. ZGN Advisor Pu Robert Romawia Royte,  Biate Ram Chapter atangin Pu Siama Nampui, Myanmar atangin Bishop Bawlliana, ZGN Advisor Pu Lalremsiama Vanchhawng, ZGN Tripura Chapter Secretary Rev. K. Lalchamliana ten thusawina hun an nei a. ZGN Vice Chairman Pu Lalbuta chuan lawmthu sawina in hun a khar a. Central YMA, MSU, MZP leh ZoRO hnenah zofate inpumkhatna atana an  hnathawh that vangin Citation hlan a ni. 2nd Session hi Business Session niin ZGN Chairman Pu Sangzela Tlau chuan a kaihruai a. 3rd Session-ah hian ZGN General Election neih a ni dawn bawk a ni.

He hunah hian ZGN OB member, advisorte leh Central Commitee member, ZGN Tahan Chapter, Tripura Chapter, Manipur Chapter, Biate ram Chapter, Shillong Chapter, London leh Germany atang te, pawl hrang hrang- CYMA, MZP, MSU, ZoRO, MUP, MHIP, CYLA, MZI, Zo-Charity International leh pawl hrang hrang atangin an tel a. Hmar leh Mara Student Association, Pang Zirlai Pawl, Hrangbana College, Govt. Aizawl College, Govt. Aizawl North College leh MZU  zirlaite an tel bawk a ni.-DIPR

Post a comment

Powered by Blogger.