Lal Thanzara Minister aṭanga bângMNF thuneitu sang pahnih, National Core Committee leh Public Affairs Commitee member-te nimina an president Zoramthanga hoa Mizo Hnam Runa ṭhukhawm chuan, Turini lei chim chhanah PWD minister Lal Thanzara an puh a, minister aṭanga báng turin an phût.

MNF chuan, Tuirini lei dawh mek February 13, Thawhlehni zing dar 9:45 vela a chim chu vanduaithlak an tih thu an tarlang a, "Thinlung takin nunna hlu tak chán chhungte kan tuarpui tak zet a, hliam tuar pawh ṭha chhuak leh thuai turin kan duhsak a ni," an ti.

Mizoramah Congress sorkarna hnuaiah lei ṭum ruk a chim tawh tih sawiin MNF chuan, "Nunna chán pawh pathum lai an awm tawh a ni. PWD Minister hian he lei chim leh hi a mawhphurhnaah la ngam ngei rawh se," an ti a; Lal Thanzara chu minister a nihna aṭanga báng ngei tura an phût tlat thu an sawi.

Vanglaini palai zawhna chhangin MNF hruaitute chuan, Lal Thanzara chu minister aṭanga a bân loha an hmalak dan tur an rel lo a, an ṭul ang zelin an rel dawn tih an sawi.

Meeting-ah India ram leh Mizoram politics inlumleh dan an thlirho thu tarlangin MNF chuan, "India ram state inthlan apiangah Congress party chu paihthlakin a awm zel a, Mizoram inthlanpui lo awm turah pawh Congress party hi mipuiten paih thla in, MNF party kutah sorkarna an pek ngei kan ring a ni," an ti.-Vanglaini

Post a comment

Powered by Blogger.