MDM-in C.Sanga pualin music video siam
Music Domain Mizoram (MDM) chuan an member boral ta C. Vanlalsanga (C.Sanga) pualin music video an siam a, zanin hian Zonet-ah tihchhuah a ni ang.
MDM president hlui C.Sanga hi nikum November thla khan a boral a, a pual hian tribute buatsaih niin, hemi kal zelah hian music vedio pawh hi siam a ni ta a ni. MDM Gospel Artist-te chuan amah hriatreng nan hian ama hla phuah, "I chakna ringin" tih hi music video-in an siam a ni. He hla hi November 2002-a a phuah kha a ni. Music video-ah hian tun lai Gospel Artsit lar - Awmawmi, BKA Bawihtlung, David Vanlalpeka, Fiona Pachuau, J.H lungmuana, Mawitei Ralte leh Zorina Ralte te an zai a ni.
Music Video producer leh MDM president ni bawk Tea Bawihtlung chuan, "A video leh audio hian belhchian a dawl a, a hla hi ngaihtlak nuam tak a nih avangin a hlu hle dawn a ni" tiin music video chuangchang a sawi. Tea Bawihtlung chuan C.Sanga chu MDM tana mi ṭangkai leh hruaitu ṭha tak a nih thu sawiin, amah hriatreng nana music video peihfel a ni ta chu lawmawm a tih thu a sawi bawk. C.Sanga hi kum 2015-16 chhung khan MDM-ah hian president niin, a thih ni thlengin executive member a ni. -Vanglaini
Music video hi Milestone Picture kutchhuak niin, soundtrack hi Mangheta siam a ni thung.
Post a Comment