CHAPCHAR KUT 2018 THUPUI : March ni 1 leh ni 2 chhunga neih tur Chapchar Kut 2018 atana inbuatsaihna chuan a vawrtawp a thleng chho mek a. Vawiin khan Chapchar Kut Organising Committee Co-Chairman leh Art & Culture Minister ni bawk Pu R.Romawia hovin a pisaah Committee member-ten Kut kaihhnawih thil pawimawh an rel a, “Sem sem dam dam, ei bil thi thi” tih chu kumin Chapchar Kut thupui atan an thlang a ni. 

SEM SEM DAM DAM, EI BIL THI THICHAPCHAR KUT 2018 THUPUI : Chapchar Kut hi kum dang ang bawkin District khawpui tinah hman leh tur a ni a. A lawmna pui ber Aizawl AR Ground-ah ni hnih hman a ni ang. A ni khat ni ah hian Kut Pa atan Art & Culture Minister Pu R.Romawia, Kut thlengtu atan Art & Culture Director Pu R.Hmingthanzuala; a ni hnih niah Kut Pa atan Myanmar-a Chin State Chief Minister Pu Sailai Lianluai chu sawm niin Kut Thlengtu atan Mizoram Chief Minister Pu Lal Thanhawla, Kut Organising Committee Chairman ni se tiin an rel a ni. Kumin hian Kut chhungin No Vehicle Zone siam tum a ni a, Kut hmang tura kalte tan parking fee chawi ngai lo turin “free parking area” siam a ni bawk ang. Kut boruak siam thei turin flag leh t-shirt bakah langsar takin Mizo taka chei banner hmun hrang hrangah tar tum a ni a, Lengpui Airport ah leh hmun dang rem chang laiah khualzinte hmuh theih turin tar chhuah a ni bawk ang. Kut hapta chhung hian Mizo mipui a tam thei ang ber Mizo inthuama inthuam turin Organising Committee chuan a ngen a, Mizoram sawrkar hnathawkte tan Mizo thuam hak ni siam a ni dawn a. Chapchar Kut Souvenir chu Kut hman zawh tawh hnua tlangzarh turin siam tum a ni bawk. 

CHAPCHAR KUT 2018 THUPUI : Chapchar Kut photo exhibition chu Vanapa Hall-ah neih a ni ang a, AR Ground volleyball court ah handloom and handicraft exhibition leh ei leh in tui hnai tak tak ei theihna hmun food court siam tum a ni bawk. Chapchar Kut ni hnih chhung hian Mizo zai leh lam chi hrang hrang te, Mizo rimawi tum leh costume parade te, chhawnghnawh, pawnto, Mizo infiamna chi hrang hrang te bakah band leh malzai ngaihnawm tak tak thlir leh ngaihthlak tur a awm dawn bawk a ni. 

Vawiin meeting-ah hian Chapchar Kut Organising Committee-a Member Secretary Pu Lalhmachhuana, Central YMA General Secretary ni bawk hnen atangin Chapchar Kut inbuatsaihna ngaihthlak a ni a. Mawhphurhna neitu Department hrang hrang hotute leh member-dangte atangin report ngaihthlak a ni bawk. -DIPR

Post a comment

Powered by Blogger.