CHOKHLEI KUT MIZORAM: Vawiin khan Lawngtlai DC Conference Hall-ah Chokhlei Kut (Chhawkhlei/Rhododendron Festival) hman dan tur relin Kut Organising Committee chu an Chairman Lawngtlai Bawrhsap Dr Arun T., IAS hovin an thu khawm.

CHOKHLEI KUT MIZORAM
He thut khawmah hian Lawngtlai East Bialtu MLA Pu H. Zothangliana, LADC CEM Pu T. Zakunga, LADC-a member-te, state leh LADC hnuaia office hotu lute leh tlawmngai pawl ai awhte an tel a. Pu H. Zothangliana chuan Mizorama tualto ngei leh Phawngpui tlang cheimawitu pangpar hminga Kut buatsaih tum chu lawmawm a tih thu sawiin, hlung leh hlawhtling taka hman theih leh la tihlen zel theih nia a hriat thu a sawi a. Chuti ang tur chuan thawh hona tha a pawimawh a ni, a ti a. Pu T. Zakunga pawhin Chokhlei Kut buatsaih tur chu phurawm a tih thu leh Lawngtlai District tihmingthatu a nih theih a beisei thu a sawi ve bawk.

Lawngtlai Bawrhsap Dr Arun T., IAS chuan Chokhlei Kut chu khawvel huap pawha pangpar mawi leh lar tak, Mizoramah chuan Mizoram tlang sang ber Phawngpui tlangah deuh chauh awm thin, Lawngtlai District mipuite inchhuanna chhawkhlei par chu chawi vul a, humhalh leh ngaihhlut deuh deuh a lo nih theih nan leh ram pawn atanga zin mite hip luhna tur atana ruahman a nih thu a sawi a. Kum tin hman a, tihlen deuh deuh theih a nih pawh a beisei thu a sawi.

CHOKHLEI KUT MIZORAM Chokhlei Kut hi chhawkhlei par vul lai tak, March ni 8-9, 2018 hian Lawngtlai District, Phongpi tlang bulthuta Sentetfiang khuaa hman tura ruahman a ni a. He Kutah hian ram pawn lam zin mite pawh hip thei tur programme hrang hrang ruahman a ni a; thlalak entirsiak (photo exhibition), Chokhlei Idol thlan, cultural programme, rock concert, hnam thuam entir (fashion show/costume parade) leh tualchhuak infiamna hrang hrang buatsaih a ni dawn a. Zai thiam tak tak zai ngaihthlak tur a awm ang a. Hnam thil, puan leh kutthemthiamna thil hrang hrang, ei leh in leh pangpar lei turte pawh pho chhuah tum a ni a; Phongpi National Park tlawh theih dan tur pawh felfai taka ruahman tum a ni.
CHOKHLEI KUT MIZORAM
Chokhlei Kut hman tur chungchangah hian February ni 19, 2018 khan hman chi a nih leh nih loh te, hman dan tur kalphung te rel a lo ni tawh a. Hetah hian Chokhlei Kut chu hman ngei tha tih niin, hman hun tur leh hman dan turte pawh a riruang duan chhin a ni a. Committee tirhin member eng emaw zat chuan a hmanna tur hmunhma te pawh an lo han thlithlai tawh nghe nghe a ni.-DIPR

Post a comment

Powered by Blogger.