CHIEF SECRETARY PU LALMALSAWMA'N TANGKAI ZAWKA VANSANG THIAMNA HMAN DAN LEHKHABU A TLANGZARH
Thusawiin Pu Lalmalsawma chuan vansang thiamna hian hma a sawn chho zel a, hun tlem zawk leh sum tlem zawk senga hmasawnna tur ruahmanna tha leh hmasawnna tluantling a awm theih nan nasa takin vansang thiamna hi hman a ni tawh, a ti a. Tun dinhmunah vansang thiamna hi leilung hausakna haichhuahna atan te, chhiatrupna lo thlen thulha lo hmachhawnna atan te, inbiakpawhna tha zawk neihna atan te, hmun hla zawka Doctor thiam rawn theihna atan te leh ruahmanna tha siamna atan a hun lai zela thil awmdan hriat nghalna (real time data) atan te tangkai takin hman a ni tiin hetiang lam lehkhabu, Mizo tawng ngeia chhiar theiha a lo awm ta hi lawmawma tih thu a sawi.
Dr. R.K.Lallianthanga, Chief Scientific Officer & Member Secretary, MIRSAC pawhin thusawiin India ram chauh ni lovin khawvelin Remote Sensing leh Geographic Information System (GIS) thiamna bakah vansang thiamna chi hrang hrang hi tangkai takin a hmang chho mek a, Indian Space Research Organisation, Department of Space (DOS) chuan hmasawnna hnathawktu Sorkar Department-te leh pawl hrang hrangten vansang thiamna an hriata tangkai zawka an hman theih nan India rama tawng hrang hranga lehlin ni se a tih angin Mizo tawng pawhin he lehkhabu hi lehlin a ni, a ti.
He lehkhabu lehlin hna hi Dr Lalnunsiama Colney, Principal Scientist, MIRSAC, Directorate of Science & Technology chuan a thawk a. Hriatchian duh leh hriat belh duh nei tan ISRO website www.isro.gov.in leh Mizoram Remote Sensing Application Centre (MIRSAC), Directorate of Science & Technology, Secretariat Complex, Aizawlah zawhchian theih a ni.
He lehkhabu "Tangkai zawka vansang thiamna hman dan" tlangzarhnaah hian Department hrang hrang aiawhte leh MIRSAC Scientists thahnem tak an tel a ni.-DIPR
Post a Comment