DAPCHHUAH RURAL HAAT MAMIT DC-IN HAWNG: Vawiin khan Pi Lalbiaksangi, Deputy Commissioner Mamit chuan NABARD leh Dapchhuah VC tangkawpin Cheng 10.36 Lakhs senga an sak Dapchhuah Rural Haat chu a hawng.
Pi Lalbiaksangi chuan Dapchhuah khawtlang tana Market Shed thlai thar zawrhna tur tha tak NABARD leh khawtlang hruaitute hmalakna zara an nei tur chu a lawmpui takzet thu a sawi a. Kawngkama chawhmeh zuar zawng zawngte chu hlawkthlak leh tangkai taka hmang turin duhsakna a hlan. He Bazar Shed hmangtute chu thianghlimna ngaipawimawha vawngfai turin a chah bawk.
Mamit DC chuan kan District chu rampum huap District hnufual 115 thlanchhuah zinga a tel ve avangin kan ei leh inah fimkhur a tul thu a sawi a. Kan hriselna thui takin a nghawng a ni a ti. Kalkhawm mipuite chu zirna lam uar sauh sauh tura chahin an thlai thar zawrhna atanga hlawkna an hmuh chuan an fate zirna lama tihmasawntu ni turin duhsakna a hlan nghal bawk.
Dapchhuah Rural Haat hawnnaah hian NABARD, Mizoram Regional Office, General Manager, Pu RK. Srivastava pawhin thu sawiin Mizoram hmun hrang hrangah Off - farm Development fund atangin Project tam tak an kalpui mek thu a sawi.
Dapchhuah Rural Haat- ah hian chawhmeh zawrhna seat 24 awm thei tura ruahman niin karleh thawhtanni atang hian an thu tan nghal dawn a ni.
Dapchhuah Rural Haat hawnna Programme hi Dapchhuah VCP Pu R. Sangbera'n a kaihruai a. VC Secretary Pu Biaksailova'n Technical Report a pe thung.
Post a Comment