Diktawn Magazine-in Miss Chapchar Kut 2018 thlang leh dawn

Diktawn Magazine-in Miss Chapchar Kut  2018: Diktawn Monthly Magazine chuan kum danga an lo tih ṭhin tawh angin kuminah pawh Miss Chapchar kut an thlang leh dawn. Chapchar kut hi March 1, Ningani khian Lammualah hman a ni leh dawn. 

Diktawn hian kum 2009 aṭang khan Miss Chapchar kut thlanna hi an kalpui ṭan a, tun thlengin chhunzawm a la ni. Miss thlan danah hian kalphung siam a ni a, Mizo thuam inbel an ni tur a ni. Kut nia Mizo nula kal khawmte aṭangin scout-te'n an duh zawng an zawng khawm a, chung mite aṭang chuan judge-te'n an lo thlang chhuak ve leh ṭhin. Miss atana thlan chhuah hnenah hian lawmman pek ṭhin a ni a, kumin pawh hei hi kalpui a ni leh dawn bawk. 

Miss Chapchar Kut bakah hian Best Costume leh Best Costume Designer-te thlan chhuah tur a ni dawn bawk a, endik dan tur mumal tak siam a ni bawk. Mizo ziarang pho chhuak thuam (thawmhnaw) inbel an ni tur a ni a, hei hian modern fashion a huam ang. Tuna kan fashion neih sa ang ni lo, Mizo puan leh thawmhnaw hrang hrang hmanga design rawn ha chhuak te aṭangin thlan chhuah an ni ang. Category hrang hrang a awm dawn a, model leh fashion designer-te tan a hranin lawmman siam a ni dawn bawk. 

Miss Chapchar Kut 2018 thlan dan tur : 

1.Mizo nula, kum 17 - 30 a ni tur a ni a, thlah pawlh a nih pawhin Mizo khua leh tui nihna nei a nih chuan pawm a ni.

2.Kut niah Mizo dress-in a inthuam tur a ni. A thawmhnaw hak chu Mizo thawmhnaw a ni tih a hriat tur a ni a, a design-ah tunlai fashion deuh tak pawh ni se, Mizo tradition pho lang thei a nih chuan pawm a ni.

3.Hmel tha leh pian nalh, nungchang mawi tak pu mi, khawtlanga hming chhiatna nei lo a ni tur a ni.

4.Ruihtheihthil, zuk leh hmuamah a fihlim tur a ni.

5.Chapchar Kut niin a hmanna pui ber AR Lammual leh a chhehvelah dar 10:00 AM - 3:00 PM chhunga awm a ni tur a ni.

Lawmman

1.Miss Chapchar Kut : Rs. 10,000/-, Crown, Citation, Photo Frame, Lehkhabu.

2.Runners Up : Rs. 1,000/-, Citation, Photo Frame, Lehkhabu. 

Best Costume leh Best Costume Designer thlan dan tur : 

1.Mizo thuama inchei a ni tur a ni.

2.Hnam dang pawh ni sela, India khua leh tui a nih chuan pawm a ni ang.

3.Category tinah thlan tur an tam dan azirin Top 5 thleng thlan theih a ni.

4.Mipa leh Hmeichhia angkhat veka en tur a ni.

Category :

1.Kids (3 - 12 Yrs)

2.Teenager (13 - 19 Yrs)

3.Mature (20 - 30 Yrs)

Lawmman :

1. Model & Fashion Designer : Rs. 1000/-, Citation, Lehkhabu 

2. Runners Up : Citation, Lehkhabu 

-Vanglaini