Farpui Tlâng Lungdawh: Mizoram khawchhak lam, Farkawn ram chhunga pípu sûlhnu tam tak zinga pakhat, lungphun 52 awmna chu Archaelogical Survey of India (ASI)-in an endik tawh. Lungphun 52-ah hian thil inziak a awm lo a; a awmna hi Farkawn aṭanga km. 3 vela hláa awm niin, tun hnaia khawtlangin an humhalh thar a ni.
Farkawn khawtlang hruaitute sawi danin, Fárkawn khaw rama lungphun awm hi a tirah chuan ngaih pawimawh nachang an hre lo a, lo atan pawh an lo nei tawh ṭhin. Khaw chhak aṭanga pipute'n thlang an tlâk laia an sûlhnu a nih ringin kum 3 vel liam ta aṭangin humhalh ṭulin an hria a, hma an la ṭan. Central lam pawhin hriain, kum 2014 khan ASI-in an endik nghal a, national heritage zinga chhiar a nih theih nan rawtna siam mek a ni.
Farkawn khawtlang hruaitute chuan, lungphun 52-te chu a pawimawhna lam an ngaihtuah thiam loh avangin an humhalh tlai tih an sawi a; humhalh a nih hnuah Aizawl leh Mizoram hmun hrang hrang aṭangin tlawhtu eng emaw zat an awm tawh thu an sawi.
Lungphun 52 awmna hmun chu 'Farpui Tlâng Lungdawh' tiin a hming an phuah a, a hmun thleng turin km. khat vela thui âwih kea kal a ngai a ni.
Farkawn khawtlang hruaitute sawi dan chuan, Farpui Tlang Lungdawh chu ASI-in an ngai pawimawh hle nia sawiin, a tlangdungin a zawmah Vangchhiaa Kawtchhuah Ropui-a pipute sûlhnu nen inzawmna a nei em tihte pawh la chhui zui zel an tum thu an sawi.
An sawi danin, lungphun ṭhenkhat chu a nghet ṭha lo hle a, sawi tlûk mai theihte a ni a; ṭhenkhat chu ft. 6 vela sangte a ni a, ft. 2 vel lek leka liante a awm a ni. A panna kawngah lungphun tur zinga mi ni ngeia ngaih lung phek ft. 5 vela seite pawh a awm a, lungsumte pawh hmuh tur a awm bawk.
Farkawna sorkar hnathawk pension tawh ZH Zuala chuan, tlâng chhipa lungphun 52 a awm ringawt chu an hrethiam lo hle tih sawiin, lungphun engmah inziak lote chu ràl lehlam, Myanmar ram Khawlhring tlangdung leh Vanzang tlangdungah hmuh tur a awm ve niin a sawi.
T Romana College-a assistant professor leh lungphun hlui leh a chhehvel zir chianna aṭanga doctorate degree nei, Dr Malsawmliana chuan, Mizoram hmun hrang hranga lungphun an zir chian tawhnaah a hlawma lungphun ni si, engmah inziak si lo chu an la hriat loh thu leh Farkawna mi chu an hriat vawi khatna a nih thu a sawi bawk.
Post a Comment