unau natna dangdai tak tuar mekAn vun chu Saranga tuam ang mai hian a tle hlurh a, ni tina a rawn durh belh zel avangin a pan luai reng a. Thovin an bawm lut lut reng avangin rim tui lo tak a rawn chhuak fo thin. An tinte chu a tla zo tawh a, chutiang bawkin 'Ha' mumal pawh an nei hek lo. An lei chu a mam pul a, a inthleh thin avangin ei leh inah harsatna an tawk thin. An thiante zinga awm chu chak hle mah se, an inthlahrun ve em avangin In chhung chu an Khawvel a ni mai! An thiante infiam chu awt taka thlir chungin, an DAM ve theih hun chu nghakhlel takin an thlir ve mek a ni; mahse, an hmalam hun chu ngaihtuah ngam pawh a nih ta lo.

Lalchhanchhuahi leh Lainunenga te uanu hi 6 an ni a. An upa ber hi kum 5 mi a nih khan Malaria natna avangin a boral tawh a. Upa lam atanga chhiara a palina chu hetiang ang vun natna mak tak avang hian a lo boral leh tawh bawk a. A naupang 2 te hi he natna mak tak, an u-in a lo boralpui tawh ang natna hi vawiin ni thlengin an la tuar ta a ni. An chhungte chuan theih tawpin an enkawl a, Doctor thiamte rawna phaia kalpui pawh an duh a; mahse, an kalpui thei si lova, vanneihthlak takin World Vision ho tanpuina a zarah Gauhati an panpui a; nimahsela, Doctor te chuan, 'Phar natna a ni lova, inkaichhawn theih a ni lo,' tih bakin sawifiah ngaihna pawh an hre lo. Dawhkan chungah an unauvin an dintir a, an lehkhabu chhah pui pui chu an keu chilh a, kar engemaw zat chu an zir vak vak ringawt a, a hnuah an sawiho leh thin a ni.

An taksa hi a no em em mai a,an lu chhip atanga ke hmawr thlenga an pan avang hian han khawih hlek te hian an pilh hma em em mai a. A tirah phei chuan pheikhawk chu sawi loh slipper takngial pawh an bun thei lo va, an Ke a durh thin avangin chhuat pawh an rap tha ngam thin lo. Tunah erawh chuan Pathian kaihhruaina zarah Slipper pawh an bun ve thei tawh a, inchhung dung velah te pawh chak vak lovin an tei ve thei tawh a ni.


An pa Pu V.L Hmingsanga chuan ti hian rilru na takin a sawi a, "Kan theih ang tawkin Pathian thu te hi kan hrilh ve thin a, Pathian chu engkim ti thei a nihzia te, Mitthi tawh Lazara pawh a kai tho va, Mitdel te, Phar te leh natna dang tam tak mihringin an tih dam theih loh natna pawh a tih dam theih thute ka hrilh thin a, anmahni pawh tul a tih hunah chuan a tih dam tur thu te ka hrilh thin a, an chanah chuan lungawi rih turin ka fuih mawlh mawlh thin. Chung thu ka hrilh te chuan Pathianin a tihdam hun tur chu nghakhlel takin an thlir thin," a ti.

An nun chu an ning ve hle thin tih an chezia leh hawiher atang chuan a hriat em em a, chuti chung chuan an unau chuan hlimna zawngin an infiam nasa ve thei hle a. Thian dang pawh kawm lovin, an pahnihin nuam taka khawvel hmang ve turin, hmangaih takin an inkawm a,an inkalsan thui phal lo va, thutthleng pakhatah hian an thu dun ral zel thin.

(A ziaktu kan hre lo, a hria kan awm chuan comment lamah aw..)

Post a comment

Powered by Blogger.