MS Dawngliana Pachuau
1. Aw kan thinlai ti hlim ṭhintu,
Kan dawn lung ruk ti kim ṭhintu
Mawite'n par ang i vul laiin a lo tliak ta i vullaini,
Aw, i hla mawi leh zai mawite'n,
Ni tin min awi kan ngai ning lo;
Mahse, tawn tur i awm si lo,
Awmhar ti zualtu mai lo ni.
Tɦunawn:
Kan ngai thiam lo hmangaih LM,
Piallei daiah run i rem hi;
I chun leh zua, i thai leh hraichawi,
I u leh nau; lenrual zawngte,
Kan ṭah laini a bang thei lo,
Inhnem tur pawh kan awm chuang lo.
2. Aw, i fam chhan i hliam te kha,
Ana a ni; kan dem lo che,
Damna run pawh i tan damna,
A tling zo lo, a pawi lua e,
Aw i fam tak ni aṭang khan,
Nang hmangaihtu zawng zawngte hi;
Kan hlim laini i liampui nge?
Hlim zai rel reng kan rel thei lo.
3. I hmangaih i liamsan takte'n,
Banah min vuan luaithli an nul;
Aw hnemtu tur anva ngai em!
Vawi khat tal han hnem leh turin,
Puini chu lem ang der ta la,
Hringmi zingah lo kir leh rawh,
Kirtiang rel reng a rem loh paw'n,
Tawnmangah tal lo leng rawh aw.
Lalṭanpuia leh Lallianmawia kha an inkawm ngeih ṭhin zia kan hria, thu leh hla lamah an tui dun em em a, Lalṭanpuia a la lar ve hle lo, mahse, ama kut chhuak hlate chu mipui zingah Lma khan; meipuia sahriak leih ang maiin a sa lar chho ta hluai mai si. An tui em emna kawngah mite hriat an hlawh chho a, an lawm em emin a rinawm. Tunlai angin kha tih hunah khan hla phuahtu kan la notice- em em lo, a satu kha kan la dah sang viau a nih kha... Pu ṬPA hi a kuhmum ni ta se, kha tih hun khan Pu Mawitea kha a par vul mek kan ti thei ang... Mahse, mahse, chutih lai chuan, Thuhriltuin a lo sawi angin, "Sava thanga awk ang leh sangha len hlauhawma man ang maiin hun ṭha lovin Lma chu a man ta.!" Amah hmuh tur a awm ta si lo a, a hla thu leh zai ri hmanga in awih mai chu tih theih awm chhun a nih rualin lung ti lengtu mai a lo ni leh si.
Ṭhian ṭhate piallei daia zal vang vang ta mai tur chu, ngaih thiam a har viau ang, Amah mai a ni lo, Lma nu leh pa, a nupui (BTI) leh a fate (Zaia leh Nunpuia) leh chhungkhat lainaho, an ṭap bang thei lo a, inhnem tur lah an awm bik hlei thei lo a ni ber mai....
Khatia a chet sualna hliam, a khabe leh hmai vel a sawh dan te kha a nasa reng lah taka! Tuar zuau tia dem ngawt chi a ni lo.. Aizawla damdawiin changtlung ber Civil Hospital- pawh kha atan damna a tling zo ta si lo. Thihna pal tlanga khawvel a chhuah san rual khan amah hmangaihtute hlimna chu; a keng tel ve emaw tih mai turin, tu amah hlim hmel hmuh tur pawh an awm hlawm lo a, hlim tum pawh an awm lo a ni ber mai...!
Pu Lma boral lai hian amah Pu Ṭpa hi hnathawkin chhim lamah a awm daih a, a rawn hâwna Thakthinga Lallianmawia Pachuau te in luah (Amah pawhin engemaw chen a lo han awm finna) ahan thlen chuan an sulhnu; engkim mai a han hmuh chuan insum zawh ahar a ni ang... Lma nupui leh fanaute a han ngaihtuah ṭhin, Amah, an pa aiawh tur ber nia inngai lah chu hnem thei dinhmunah a din loh zia a inhre chiang si.. Hnemtu an mamawh tak zet a, a damlai pawha thil engkim hahdam thlak zawnga la thiam mi, Harsatna lian tak a tawh pawha ṭhenrualte zinga ti lang em em lo mi khan, kha thihna kha (mitthi khua a mite kha) tih derin; a nupui fanaute vawi khat chauh tal rawn hnem leh turin a han sawm uk a, Mahse, thil theih a ni tawh si lo....! A va beidawn thlak tak em! Kawng awm chhun ber mumangah tal hmu leh theih turin a ṭhianpa duh tak, fam chang tawh chu hlain a au lawm lawm mai a ni.
Zep thu a cheng lo, Lallianmawia Pachuau zai thiam leh hla phuah thiam, la naupang si, lar em em mai a han boral ta chu tlang hran hrana zofa awmte rilru anain, an tuar em em a, a thu leh hla vanga lo ngainatute tawrh aia naa tuartu a ṭhianpa, a unaupa ni bawk Lalṭanpuia'n amah leh Pu Mawitea chhungte huap veka an tawrhna, hlain a rawn puang chhuak ta chu.. Zofate thinlung ngui chawk thoin, hmun tinah a lar ta em em mai a nih kha maw....!
Post a Comment