Mizoram University-a Department of Mass Communication chuan nimin khan Academic & Seminar Complex conference hall-ah 'Media & Women Empowerment: Policy, Praxis and Promotion' tih thupui hmangin seminar an buatsaih a, MZU vice chancellor KRS Sambasiva Rao-a'n a hawng.
MZU Vice Chancellor chuan, hun kal ta lamah hmeichhiate'n khawtlang nunah chanvo an nei tlem hle ṭhin tih sawiin, "Tunah chuan media lamah pawh hmeichhiate an pawimawh telh telh a ni. Hmeichhe dinhmun chawikan a nih theih nana pawimawh ber chu zirna a ni a, lehkhathiam an nih tlat chuan hmeichhiate hi thuhnuai theih an ni lo, a chhan chu an dikna chanvo an hriat vang a ni," a ti.
MZU Mass Communication-a HoD Irene Lalruatkimi chuan, khawvel hmasawnna ṭhang zelin a ken tel, media-in ni tin nun a tidanglam mek tih sawiin, "Media hmang hian hmeichhiate chawikan leh hmasawnna kawng nasa takin a inzirtir theih a, chutih rualin, hmeichhiate dikna leh chanvo media-in a hum a pawimawh," a ti a; hmeichhiate dik lo tak leh mawi lo taka lantir leh chhuah hi dan hmanga hrem theih a nih thu a sawi.
Seminar hian ni hnih a awh dawn a, research article leh mithiamte'n media leh hmeichhiate dinhmun chawisanna lam hawi chi hrang hrang an sawi a, sawihona hun hman ṭhin a ni. -Vanglaini
Post a Comment