mizoram govt hpcd aggrementAizawl 10.02.2018 : Home Minister R Lalzirliana chuan, Mizoram sorkar leh HPC(D)-te'n inremna an nei dawn a nih chuan, a tu zawk zawk pawh inphah hniam chin neih a ṭul thu a sawi.

Home Minister hian nimin khan Congress Bhavan-a inkhawmah thu sawiin, Mizoram sorkar leh HPC(D) aiawhte chu official level-ah ṭha taka an inbiak tawh thu a sawi a, "March 5, 2018 hian political level-ah inbiak leh a ni dawn a, remna duh ve ve chu inphah hniam tawn pawh a ngai thei," a ti.

Tun hmain Mizoramah hel chètna hriat tur a tam ṭhin thu sawiin R Lalzirliana chuan, "Congress-in sorkarna a chan hnuah helte chètna hriat a khát tawh hle," a ti a; Congress sorkar hnuaiah chuan helte an chèt pawhin a chháng lèt turin police-in theihtàwp an chhuah ṭhin thu a sawi.

Home Minister chuan, Chief Minister vêngtute'n mi kut an thlàk chungchangah, "IGP-te kan inah ka ko a, CM guard-te hi suspend vek turin ka hrilh. Mahse, an zir chianna min entir hnuah ka thu ka sût leh a ni," a ti.


CM vêngtute'n an tih tur dik tak an tih thu sawiin HM chuan, "Mahse, an che chuangliam ve deuh a ni," a ti a; police-te chu hetiang thil ti tawh lo tura hrilh an nih thu a sawi.

R Lalzirliana chuan Sihphir khawtlang hruaitute nen an inkawmnaah, dan leh thupek kengkawngtu a nih ang leh MPCC Vice President a nih angin ngaihdam a dil thu a sawi a, "Anni lam pawh inphah hniam takin an awm a ni. Inremna siam theih a ni hi a lawmawm hle," a ti.

Lirthei khalh reng rengin, miin pelh an dil chuan VIP an ni emaw, ni lo emaw, inken a ṭhat thu sawiin Home Minister chuan, "Keini aia hmanhmawh zawk an ni tih hriat a pawimawh, a ti a; Serkhana thil thleng chu Mizo mipuite'n inzirna atan hmang se a duh thu a sawi.
-Vanglaini

Post a comment

Powered by Blogger.