India rama chanchinbu darh zau ber pawl, The Hindu chuan India mi kutchhuak sapṭawng lehkhabhu ṭha a thlan chhuah zingah Mizo nula, Suzanne Sangi kutchhuak a tel. Lehkhabu hi tun hnaia tihchhuah aṭanga thlan chhuah a ni.
Suzanne Sangi hian ‘Facebook Phantom’ tih a ziak a, hei hi lekhabu ṭha leh chhiar tlak thlanchhuah panga zingah a tel a ni. A lehkhabu hi kum 15 mi a nih aṭangin a ziak ṭan a, kum 17 a nih kumin tihchhuah a ni a. A chhungah hian ‘supernatural fiction’ hmangin tunlai ṭhalaite nuna facebook hnathawh dan a pholang a, Sonali-i'n a hmelhriat loh Omi Daan fiend request a accept aṭang a nun lo danglam chhoh dan, hlauhawm, ṭihbaiawm, thlaphanthak leh ngaihnawm tak tarlanna a ni. Facebook Phantom bakah hian - Moin and the Monster, Haroun and the Sea of Stories, The Simoquin Prophecies leh No Guns at My Son’s Funeral’ tih Paro Anand ziah te chu India ṭhalaite tana chhiar atana ṭha thlanchhuahte chu an ni.
Suzanne Sangi hi a lehkhabu ziah avang hian National TV channel lar tak pakhat NDTV Prime pawhin an kawm tawh nghe nghe. Tunah hian media-technology company pakhat ‘Zapr Media Labs’, Bangalore-ah Content writer-in a thawk mek a, tunah hian a lehkhabu pahnihna tur ‘Facebook Anomaly’ tih a buatsaih leh mek. Amah hi Banglore Mizo Kohhrana Tual Upa Dr. Hrangthanchhungi fanu niin, Bangalore-ah an khawsa mek a ni.
Post a Comment