Mizoram Politics: MNF vice president Dr R Lalthangliana chuan, kumina Assembly inthlanah MNF-in sorkarna an siam theih a nih chuan, tualchhung inrêlbawlna ṭha zawk a awm theih nan The Mizoram Local Government Act, 2019 siam a nih tur thu a sawi.


Dr R Lalthangliana hian February 3, Inrinni khan Sihfa community hall-ah SEDP training buatsaihah thu sawiin, "Kan sorkar chuan thingtlang mite thuneihna sang zawk pek an ni tawh ang a. Kan sorkar aṭanga budget session hmasa berah 'The Mizoram Local Government Act, 2019' kan pass dawn a, hemi atan hian kan inpeih thlap tawh. Hetianga kan tih chuan, tun anga minister/MLA-te'n tualchhung mite an pal bawrh bawrh a bo tawh ang a, sum hman dik loh tam tak leh corruption thlengin a bo phah dawn a ni," a ti.

SEDP hmalakna ki pui ber pakhat chu chawa intodelh a ni tih sawiin R Lalthangliana chuan, "Khawtlang nun a rálmuan a, tihdam leh invenna health care changtlung zawk te, ram thil dehchhuah a pun theihna tur te, zirna lama chhawr tlak thiamna chher chhuahte chu a tum ber a ni," a ti a; SEDP chu NLUP anga khát pheuh pheuha sum tlemtê tê inpekna ang a ni dawn lo niin a sawi.-Vanglaini

Post a comment

Powered by Blogger.