MFM SCHOOL OF NURSINGLAITHANGPUII COLLEGE OF PHARMACY : Vawiin khan Education Minister Pu H. Rohluna hovin Mission Foundation Movement (MFM) hnuaia Laithangpuii College of Pharmacy graduate thar te lawmpuina leh MFM School of Nursing a zirlai tharte lukhum khumtirna Capping and Lamp Lighting hun chu Tourist Lodge, Chaltlangah neih a ni.

Education Minister Pu H Rohluna chuan MFM hmalaknate chu chhuanawm a tih thu sawiin thalaite mipui rawngbawltu ni tura kaihruaitu leh eizawnna ngelnghet an neih theih nana buatsaih tu pawimawh tak a ni, a ti a. Minister chuan nursing chu hna zahawm tak a nih thu leh kai tharte thutiam lak chu a taka nunpuia damchhunga vawn tlat a pawimawh thu a sawi a. Minister chuan hlawhtling tur chuan harsatna tam tak paltlang a ngaih thu sawiin zirlai tharte chu an chhungkaw tana inghahna tlak leh mihringpuite tana malsawmna ni thei turin zir chhung zawnga thahnemngai taka bei turin a chah a. Tunlaiah zirlaiten zirlai aia social media leh adangte an buaipui nasa chu pawi a tih thu sawiin thalaite an nih tur ang nih phak loh tir tu a ni, a ti.  Pu H. Rohluna chuan sawrkarin “skill development” a ngaihpawimawh thu leh Mizoramin skill development mumal taka a kalpui theihnan Mizoram Skill Development Policy buaipui mek a nih thu a sawi bawk a ni.


MFM SCHOOL OF NURSING: MFM hi kum 2002 khan din niin Managing Board OB 7 leh Committee Member 12 ten an enkawl a. An hnuaiah hian MFM School of Nursing, Laithangpuii College of Pharmacy bakah Pre Service Missionary Training, Community Health Clinic, Life Skill Training Centre, Community Development Programme, Livelihood Promotion through Skill Training leh Mental Health Programme-te an kalpui a ni. Indian Nursing Council leh Mizoram Nursing Council phalna in kum 2009 khan MFM School of Nursing hi hawn niin mi 175 ten tha takin an zir chhuak tawh a. Tun dinhmuah Teaching leh Non-Teaching Staff tiamin thawktu 12 an awm a, zirlai thar mi 24 an nei. Laithangpuii College of Pharmacy hi kum 2012 khan din niin vawiina pass chhuak certificate hlan hi mi 15 an ni a, Mizorama Pharmacy College hmasa ber leh awm chhun a ni.

Laithangpuii College of Pharmacy Graduation leh MFM school of Nursing Capping and Lamp Lighting Ceremony ah hian MFM Chairman Pu K.L Zamvela chuan kalkhawmte lawmna thu a sawi a. Capping & Lamp Lighting hi Principal Nursing Officer (Rtd) Pi Lalthari Ralte kaihhruaiin Pharmacist Graduation hi Mizoram Pharmacists Association (MPA) President Pu Timothy Thanchungnunga’n a kaihruai thung. Mizoram Nursing Council in exam a buatsaih leh Pharmacist Exam-a tithate hnenah khuallian Pu H . Rohluna chuan lawmpuina thilpek a hlan bawk a ni.-DIPR

Post a comment

Powered by Blogger.