Mizo Infiammi Jeremy Lalrinnunga'n Gold Medal La (Infiam Chanchinthar)

Mizo Infiammi Jeremy Lalrinnunga'n Gold Medal  La: Khelo India School Games 2018-ah Mizo rawltharte weightlifting-ah an che ṭha, Jeremy Lalrinnunga chuan gold medal lain Jacob Vanlaltluanga leh Zakuma ten silver medal an dawng bawk. Amaherawhchu, Mizo rawltharte hian Mizoram ai an awh lo a, an inzirna hmun SAI awmna Maharashtra hmingin medal an la. 

Delhi-a neih inelnaah hian Jeremy Lalrinnunga chu 62kg inelna huangah inlanin; snatch-ah 115kg, clean & jerk-ah 136 chawiin, a belhkhawmin 251kg a chawi a, ani aia chawi rit an awm lo.

Jacob Vanlaltluanga chuan snatch 111kg, clean & jerk 136, a belhkhawmin 247kg a chawi a. Zakuma pawhin 56kg huangah a inlan a, snatch-ah 102kg, clean & jerk-ah 120kg, a belhkhawmin 222kg a chawi a. Mizo rawlthar pahnih hian silver medal an dawng.

Govt. Complex rawlthar pathum hi kum 2011 khan catch them young hmang ṭangkaiin SYS coach Malsawma Khiangte kaihhruaina hnuaia inzir chhuak an ni a, tunah hian Tokyo Olympic 2020-a inlan phak beiseiin Maharashtra SAI hnuaiah an inzir mek a, hetah hian Army coach Zarzokima hnuaiah an awm.

Mizo weightlifter chher chhuaktu Malsawma Khiangte chuan, "Kan nauten Mizoram hming khel thei lo mah se an hma hun atan hlawhtlinna an chang hi kan lawmpui a, player bakah coach te tana sorkar laipuiin hamṭhatna a siam hi a lawmawmin chona ṭha tak a ni," tiin Vanglaini a hrilh.-Vanglaini