State Cancer Expert Committee din dawn
Mizoram State Cancer Expert Committee : Health & Family Welfare department leh Swasth Uttar Purv, Public Health Foundation of India (PHFI) ṭangkawp chuan, February 5, Thawhṭanni tlai khan Aijal Club-ah 'Consultative Expert Committee Meeting on Cancer in Mizoram' an buatsaih a; State Cancer Expert Committee din an rel.
Inràwnkhawmna hmanpuitu, Health minister Lal Thanzara chuan, mithiam kalkhawmte inhmuhkhawmna chuan hlâwkna a hrin chhuah ngei a beisei thu a sawi a, "Mithiamte finna leh hriatnate kan chhawr ṭangkai ngei dawn a, Mizoramah cancer veite enkawlna Regional Care Centre (RCC) kan neih pawh Tertiary Care Cancer Centre (TCCC)-a hlankai tawh a ni," a ti.
Meeting-ah hian, Mizorama cancer dinhmun zir chiangtu tur State Cancer Expert Committee din ni se, an ti a; kumin chhunga mipui hnena nasa zawka cancer chungchang inzirtirna neih dan tur te, Mizoram State Cancer Institute (TCCC) chu Comprehensive Cancer Care Facility (Superspeciality Cancer Hospital)-a hlankai a nih theihna atana hmalakna turte an rêl bawk.
Inràwn khawmna hun hi Health secretary Lalrinliana Fanai-in a kaihruai a, mithiam hrang hrangte'n cancer kaihhnawih thupui hrang hrang an sawi a ni. -Vanglaini
Post a Comment