Hmeichhe baihvaite tlûkluhna tur OSC hawng
Social Welfare Minister chuan, hmeichhe baihvaite tana buatsaih centre changtlung tak puitlin a lo ni chu lawmawm a tih thu sawiin, "One Stop Centre-a thawktute chu mi chanhai leh enkawl harsate enkawltu an nih angin an hna a pawimawh hle a ni," a ti a; inpekna rilru leh hmangaihna nen rawngbawlna rilru pu chunga thawk turin a chah.
Sorkarin hmeichhia harsatna tâwkte ṭanpui tur leh hmeichhe dinhmun chawi kâng turin nasa taka hma an lak thu sawiin PC Lalthanliana chuan, "In chhung khura hmeichhia dinhmun chhe taka awmte leh kutthlak tuar
ṭhinte report-a ṭanpuitu turin 'Mahila Police Volunteer' scheme kalpui thuai tum a ni," a ti.
One Stop Centre hawn inkhawm hi Social Welfare director Laldikkimi’n a kaihruai a, VOLCOM, Mizoram Positive Network, ICPS, Durtlang Local Council, State Council for Child Welfare, State Social Welfare Board leh Social Welfare department hotute an tel a ni.
One Stop Centre hi Ministry of Women & Child Development bultuma hmeichhia hleilenna tuar leh baihvaite tana tlukluhna leh inhumhim lailawkna atana buatsaih a ni a; OSC pantute chu ni nga chhung an awm thei a, an awm chhungin ei leh in, riahna leh mimal ni tin mamawhte a thlawna tumsak vek a ni dawn a, damdawia enkawlna, counselling leh dan leh hrai lama puihnate pek tur a ni bawk.
India ram state tinah OSC pakhat tal awm tura tih a ni a, Mizoramah chuan October 2016 aṭang khan Women Helpline, Khatlaah OSC kalpui ṭan niin, thubuai 24 an buaipui tawh a ni.-Vanglaini
Post a Comment