BJP nen inzawmna kan nei lo - Zorama

Mizoram Politics - BJP Leh MNF Inzawmna Nei LoMNF president Zoram­thanga chuan nimin khan North Vanlaiphai commu­nity hall-ah MNF Hrang­turzo West & East Block Joint Conference a hmanpui a; kum 2018 Assembly inthlanah MNF-in thawhpui an nei dawn lo a, an mal din dawn tih a sawi a, BJP nen inzawmna an neih loh thu a sawi bawk.

MNF Prsident chuan, mi ṭhenkhatin MNF chu BJP nena inzawmna nei ang dawn dawna an sawi ṭhin thu sawiin, "BJP nen ngat phei chuan inzawmna pakhat mah kan nei lo leh zual a, kan thuthlungah chhim leh hmar ang kan ni," a ti a; Congress ni lo zawng zawng, Congress sorkar duh lo intelkhawmna NEDA leh NDA-ah an tel ve a, chutah chuan MPC leh ZNP pawh an tel ve niin a sawi.

Zoramthanga chuan, tun hmain ZNP leh MPC-te an thawhpui tawh ṭhin thu sawiin, "Thawhpui neih hi a fuh ngai lo tih kan hre tawh," a ti a; thawhhonaa sorkarna an siam pawhin kum khat bak an kalho ngai loh thu a sawi a, "Mal kala theih tawpa beih hi a thlum­zia kan tem tawh," a ti.

ZPM chungchangah Zoramthanga chuan, "ZPM hian innghahna tur unit bulfûk an nei lo a, an zinga nei awm chhun ZNP leh MPC lahin an nei mumal tawh hek lo. Thawkho anga lang si hi pakhatah lungrualin an inhlawm khawm thei lo a, hotu berah an buai nghal pang a. An kal kal hian lo kal ve se, MNF tan engto leh hlauh tur a chhetê mah a awm lo," a ti.

MNF thuchhuah chuan, N.Vanlaiphaia block conference-ah hian Khawlai­lung, Bungtlang, Keitum, Hmunzawl, Hriangtlang, Chekawn, N.Vanlaiphai leh Mualcheng aṭangin an party zawm thar mi 182 MNF-ah Zoramthanga'n a lawm lut niin a tarlang. -Vanglaini

Post a comment

Powered by Blogger.