MṬKP Inkhawmpui thlengtu puihna atan Member tinin Rs. 20 an thawh dawn

Mizoram Ṭhalai Kristian Pawl (MṬKP) chuan nimin khan BCM Peniel Kohhran biak-in, Hnahthialah Rorel vawi 64-na an nei a; MṬKP Inkhawmpui thlengtu puihna member tina Rs. 10 an khawn ṭhin chu Rs. 20 ni tawh se, an ti.

MṬKP Rorel hi president Rev. JC Vanlalluaia'n a kaihruai a, BCM general secretary Rev. F Ramdinmawia'n hun­serh a hmang a; rorel palai 463 an tel.

ṬKP rorel chuan, MṬKP Inkhawmpui thlengtu ṭanpuina member tina Rs. 10 khawn ṭhin hi Rs. 20-ah tihsan ni se, an ti a; BCM ṭhalaite leh zirlai naupang zawkte tan career guidance kalpui tura hmalak an rel.

Kum 2018 MLA inthlan awm turah ram hmangaihtu dik tak thlan chhuah a nih theih nan unit tinah a huhoin ṬKP Day 2018-ah ṭawngṭai rual an rêl a; BCM Fellowship Organization department-in MṬKP budget ceiling a siamsak cheng nuai 10 chu kum 2018 budget atan an pawm bawk.

ṬKP hian pastor bial 84-ah unit 415 a nei a; member 45,058 awmin, mipa 27,900 leh hmeichhia 17,158 an ni. Kum 2017 chhung khan kohhran dan puitlinga innei tuak 349 an awm a, member thi 122 an awm.

Report-a a lan danin, Mizoram State AIDS Control Society hmalaknain Mizoram ṭhalaite HIV laka an him a, thisen thianghlim hman tlak neia regular taka thisen petu an pun zel theih nan 'Heroes Campaign' an kalpui a ni. Mihringa sumdawnna (human trafficking) chungchang leh ruihhlo ṭhat lohzia inzirtirna an buatsaih a, BCM Assembly thu bawhzuiin fa neih tam inzirtirna an kalpui bawk. -Vanglaini