"Mizorama sorkar kal tawh reng rengin an la tih loh MNF sorkar tharin a ti dawn"

-R.Tlanghmingthanga

mizoram mnf party zoramthangaNi 12.02.2018 (Thawhṭanni) hian Ṭawi West Block chuan Thingsulthliah Community Hall-ah Hnam Pasalṭhate chawimawina leh Block Conference hun hman a ni a. Hnam Pasaltha la damte leh ram leh hnam tâna nun hlântute, 'Zoramin manganna vawrtawp a tawh laia Laikhum bela lo chhing bo mai lovin, Râl leh Sa hmaa zâm ngai lo MIZO vâl ngei kha, Ram leh hnam chhan nana i inpekna avangin, HNAM PASALṬHA tiin kan hre reng tawh ang che u.' tiin chawimawina hlan an ni.

MNF President Pu Zoramthanga'n he hun hi a hman pui a, mithar - Thingsulthliah -132 voters leh Seling -54 voters an vaiin mithar 186 MNF-ah a lawmlut.

Khuallian MNF President Pu Zoramthanga chuan, "kan hnam Pasalthate leh an chhungkuate, MNF-a awm mekte hian mi sak ve theih loh hla mawi kan nei a, kan ram leh hnam tana Lu chhum, bân chhum huama an nun an lo hlannate, kan hnam damna atana kan lo inpek tawhna ang hi tuten emaw sawi nep tum engang mahse, a thlawn lo a ni tih hi ṭhangtharten an la hre chhuak zel dawn a ni," a ti.

Pu Zoramthanga chuan, "Congress chu Central-ah an tla fai vek tawh a, State inthlan apiangah an tla zel a, a zik la awm chhun Mizoram Congress sorkar hi kum tawp Election-ah kan fik hmawk ang a, a tam berah MLA 10 pawh an neih ka ring tawh lo. Kum tawpah chuan India ramah Punjab State-ah chiah an sorkar tawh ka ring. Pathian leh mipui zarah MNF kan sorkar ngei ngei ang tih lo ring rawh u," a ti.

He Block Conference hi Thingsulthliah khaw chhehvel aṭangin mi tam takin an rawn chhim a, Pu C.Lalramchhana, President MNF, Ṭawi West Block chuan a kaihrua a ni.

Vawiin ni 12.02.2018(Thawhtanni) vek hian Mizo Hnam Runah chhung inkhawm neih a ni a. MNF Vice President Pu R.Tlanghmingthanga chuan MNF-in sorkarna a chan rual ruala tih tur leh hmalakna tur pawimawh hrang hrangte a sawi a, "MNF a sorkar chuan mipui ta, mipui tana ding tur a nih angin mipui (ram neitute) duh danin a kal ang a, hnam dintu leh neitu Pathian duh dan leh beisei tihlawhtling turin hmalak a ni ang a, hlemhletna tello corruption-a fihlim sorkar a ni ang. Sorkarin tih tur a tih leh tih loh tur a tih DAN chu ṭha taka zawm a ni ang a, DAN kan zawm vek chuan harsatna kan tawk ngai lo ang. 'Pathian leh kan ram tan' titu kan nih angin Kristian nun dan tha a taka zawm tura inzirtir te, 'hnathawktu chu hlawh hmu tlak a ni' tih a nih angin hnathawh nasat kan inzirtir ang. Langtlang sorkar kan siam dawn a, project leh plan-te enkawlnaah Party-in a hriatpui leh remtihpuinain a kal ang," a ti a.

Pu R.Tlanghmingthanga chuan, "Pathian leh kan ram tan tih thupuia innghat kan nih angin Pathian leh mipui duhdan a lal ber ang a, kan hnam sipaiten kum 20 chuang zet hrehawm tinreng tuara Martar tam takte tawrhna leh insenral vekna azara kan neih, foreigner chu sawi loh kan phalna lo chuan India mi pawh kan ramah an luh theihlohna leh sumdawn a theihlohna dan te, kan sakhua leh hnam dan kalphung kalha parliament-in kan pawmpuina tel loa thuneihna a neih loh dante khawng taka vawn zel a ni ang a. Mizorama sorkar lokal tawh reng rengin an la tih loh mipui rorelna kan kalpui dawn a, mipui hnena thuneihna pek kalphung thar kan ruahmanna chu chipchiar takin MNF SEDP Appendix-ah Assembly-in a hma thei ang bera DAN a siam mai turin vawn that a ni tawh a. India Dan pui 73 & 74 Ammendment-in a lo siam, kan ram Mizoram mila siam theih tura phalna min pek angin khawpui leh thingtlang enkawl tur tualchhung rorelna chu District leh khawtina din turin MNF chuan hma a la ang. Chu rorelna Dan thar chu 'The Mizoram Local Government Act, 2019' tih a ni dawn. Hei hian Village-tinten anmahni veng/khua atan ruahmanna, inrelbawlna planning leh development chi hrang hrangte chu khaw mipui kalkhawm, khaw VC/Local Council (Gram Sabha/Village Assembly) kaihhruainain India Constitution hnuaiah an rel ang ang chu sum ruahmanna ṭul angte nen Municipal Council/Board kaihhruainain District Deveopment Council-in State sorkar-ah an thlen zel ang a, vantlang inṭawm thil leh chhungkaw hmasawnna tur ruahmannate chu khawchhung mi zelin an thawk tawh ang. Kan State chhungah hian hmasawnna rualkhai zawk 'Thuneihna sem zai' chu kan kalphung thar tur a ni tawh ang a, decentralization of power hmangin kan hnam duh dan milin kan kal tawh ang," a ti bawk.

Mizo Hnam Run chhung inkhawm hi Pu D.Thangliana National Core Committee member-in a kaihruai a, Pu Lalthanzuala Hnamte Secretary, MNF Gen.Hqrs.chuan hunserh a hmang a ni.

(R.LALTHLAMUANA)
Joint Secretary
Media & Publicity Dept.
Mizo National Front
Memo No.MNF/Media/01/2018/172
Dt.12.02.2018.

Post a Comment

Powered by Blogger.