zorimawi khawvelZiaktu: David Z Hmar

Amah Pu T. Zorampela thukhawchang hian bul tan teh ang :

"Kei ka thlirna kil atang phei chuan hla thu chauh phuaha a thluk midang phuahtir thin tam tak hi hla phuahtua chhalin hmingthatna lem lem kan khumtir ni ber hian ka hre thin. Sap hla thluk mawi ber berte ringin hla thu tha tak tak lo bel ve ta ila, miin hla phuahtua min chhal leh chhal loh chu thu hran, keimah chuan hla phuahtuah ka inchhal thei ngai hauh lo vang tih hi ka pawm dan kumkhua chu a ni. Sap hla thluk emaw, Zopa hla thluk emaw rinchhana hla phuah kan nih pawhin a lemchuanna ka hre lo." 
tiin "Thu leh Hla" The Mizo Academy of Letters ten thla tin a an tihchhuah journal, September 2017 issue ah "Hla leh a phuahtu nihna" tih thupui hmangin a rawn ziak kalh a ni.


Pu T. Zorampela, hranghlui musician, thuziak hi ka pawmdan nen a inmil hle mai a, ani reng lah tak a, tunlaiah hla thuziaktu/hla thu phuahtu tam tak ten hla anihna ti puitlingtu hla thluk phuahtu te tarlang ve ta lemlo in anmahni hming chauh an ti lang ta mai thin a, a huaisenthlak thin hle in ka hria. Sap ho pawh hian Songwriter credit an pek reng reng chu kha hla thu ziaktu, a tune siamtu leh a music arrange tu (tunlaia zaithiam ten an hla sak tur music track studio a an siamtir thin ang nen hian ngaihpawlh lo ila - David Z Hmar) mi hrang annih hlawm chuan an hming an ziak tlar duat thin.

Thuziak a thui lutuk loh nan hemi sawifiah nan hian kan Mizo hla tam tak zingah hmanlai chan chang ve ta, nalh chuai chuang silo hla thenkhat han thlurbing dawn ta ila a tha awm e. Heng ka hla han thailan te thluk siamtu hi ka mi hriatchian leh ka ngainat em em a ni a, vanduaithak takin chatuan ram a pan tawh a ni.
1. Lenlai a rual lo.
2. Min vei ve rawh.
3. A na a thar zel thin.
4. Tuarthiam a har.


A hmasa a ka dah "Lenlai a rual lo" tih hla hi Pu Englandthanga (L) hla thu phuah niin, a thluk hi Pu Rohmingthanga (Raw-a) of Chaltlang veng phuah ani a, Pu Raw-a min hrilh danin a thu original Pu Englanthanga'n a rawn ken hmasak ber chuan hla thluk nena inrem lo tur a awm nual avangin a phuahbelha a siamrem bawk niin a sawi. He hla mawi tak mai sawichhuah nikhua leh sakchhuah nikhua a, a phuahtu anga a thu phuahtu hming ringawt an lam ri thin hi ka lo ui thin a, tunge a phuahtu tih sawi dawn chuan Pu Englandthanga leh Pu Raw-a tih ngei ngei tur a ni. A thluk tello a sak theih anih miau loh avangin. 
He hla hi Pi Lalneihthangi'n a sa chhuak hmasaber a, a hnu a Pu Englandthanga nupui nau Pi Sailothangi Sailo in mawi takin a sa bawk a, tun hnu ah Mimi Lalzamliani'n a record a, a tunlai berah chuan Pi Lalenkawli'n record veleh in lyrical video youtube ah a dahchhuak nghe nghe. (Pu Englandthanga (L) leh Pu Raw-a (L) te ka respect em em - David Z Hmar)

Hla pahnihna hi "Min vei ve rawh" tih ani a, he hla pawh hi Mizo hla lar leh thluk mawi tak Mizo raih mai bawk ani a, a thu hi Pi Lalneihthangi phuah niin a thluk hi Pu Raw-a phuah a ani. He hla pawh hi tu phuah nge tih kan sawi dawn chuan an pahnih hming hi tihlan ngei nge tur a ni. A hla thu phuahtu Pi Lalneihthangi sak lar a ni.

Hla pathumna "A na a thar zel thin" tih hla hi a thu Pi Lalneihthangi niin a thluk erawh Pu Raw-a phuah bawk a ni a, Pi Lalneihthangi sak lar niin, Pi Rebecca Saimawii'n mawi takin a rawn sachhuak bawk a. He hla hi tu phuah nge tih kan sawi dawn chuan Pi Lalneihthangi leh Pu Raw-a tih tur a ni.

Hla palina "Tuarthiam a har" tih hla hi a thu phuahtu chu Pi Lalneihthangi bawk ni in, a thluk erawh Pu Raw-a phuah ani leh thung ani, a sa lartu hi Pi Lalneihthangi niin tun hnu ah Rinrini'n mawi tak maiin a rawn sa chhuak veleh bawk.

Heng Pu Raw-a hla thluk phuah ho hi an class a danglam in an mawi hlawm em em a, heng hla lo pawh hi hla thluk phuah a nei nual a. Ama sawi dan takin "ka rilru a awmlai ka record vat loh chuan ka theihnghilh leh mai thin a" tiin a sawi a, tumkhat a ramkal/huan kal (ni ta in ka hria) tuma a rilru a lo lang chu mawi a ti em em mai a, mahse in a thlen chuan a theihnghilh daih mai a, a uizia min hrilh. Pu Raw-a creativity level hi a sang hle a, dam reng atan a duhawm tehlul nen Pathian remruat mihring dan chi rual ani silo a.


Hla thu hi chu music kalphung mik a mak hrelo pawhin thinlung a alo kal tawh chuan an ziak mai thei zel a, beat and bar felfai dikthlap mawi taka sak tura chhuak tur chuan thluk alo pawimawh tel si a, a hran ve ve in hlu viau mahse, a kalkawp tluk thu awm suh le.

Engpawh ni se Zofa te ah hian (Mizoram chhung leh pawn) hla phuahtu a thluk leh a thu phuah nghal thei leh hla thu mawi tak tak a phuahchhuak thiam, a thluk midang siamtir thin tam tak an awm a, mahse heng zawng zawng hi sum chang thlai ala ni thei tak tak bawk silo, mipui lahin a FREE a neih kan tum fur bawk nen, sorkar lamah lah hetiang lam atana structure han siam tum lam chu kan hotute ngaihpawimawh loh zawng tak alo ni bawk si a. Talent turu tak tak hi sum changthlai a chang thei silo hian khawlaiah a vakdarh suau suau mai zawng anih hi maw. Engtikah tak Mizo Music industry hian khaweng hmel hmu ve tak ang maw. Dan kan nei tha, mahse .... tiin ziak chuai raih rih mai ang aw.

Comment lamah heti lam tui ten han chhunzawm mai teh u.

Post a comment

Powered by Blogger.