Mizoram Entrepreneurship Development Monitoring Committee (MEDMOC) leh Confedaration of Indian Industry (CII) chuan nimin khan Aijal Club-ah 'Entreprenuership Conclave 2018' an buatsaih a; khuallian Lalsawta, Planning minister chuan sorkar hna ni lo eizawnna hlâwk zawk zawn a ṭul thu a sawi.
Lalsawta chuan, Mizoramah chuan sorkar hna chu eizawnna ṭha nia ngaiin mipuiin an bawh nasat thu a sawi a, "Sorkar hna hian mi zawng zawng a daih loh avangin eizawnna ṭha leh hlâwk zawk kan zawn a ṭul. Pathianin ram ṭha, engkim ṭhat duhna hmun Mizote a pe a, hei hi kan hman ṭangkai a ṭul a ni," a ti.
Planning Minister chuan, ngaihtuahna ngunthlûk zawka hmanga thar chhuah tihpun, thlai thar hralhna hlâwk zawk hmuh leh thar chhuah dahna hmun ṭha siam chhuahte chu thil pawimawh a nih thu sawiin, "Lehkhathiam hna hmu lote harsatna sukiang tura thawh theih hnai vai ber chu agriculture hi a ni," a ti a; contract farming leh organic farming tih tak zeta thawh chuan eizawnna hlawhtling leh hlâwk takah siam theih a nih thu a sawi.
Planning secretary Dr C Vanlalramsanga pawhin thu sawiin, NEDP kaltlanga sorkarin hmalakna lian tham a neih mek laiin, contract farming leh organic farming lama sum leh pai peipunna lam hawi Entrepreneurship Conclave buatsaih a nih thu a sawi a, "Ram changkangah agriculture leh a kaihhnawih eizawnna hi sumdawnna hlâwk a ni," a ti.
Entreprenuership Conclave 2018-ah hian sorkar mi pawimawh te, zirlai te, sumdawngte leh lo neitute an tel a; mithiamte'n thupui thlan bik hmangin thu an sawi a ni.-Vanglaini
Post a Comment