TUIRINI LEI CHIM TUIRINI LEI CHIM: Vawiina Sesawng-Khawruhlian kawnga Tuirini lei dawh that mek chim chungchangah Chief Minister charge la mektu Home Minister Pu R.Lalzirliana hovin a pisa-ah Dy. Speaker Pu R.Lalrinawma, PWD Minister Pu Lal Thanzara, Supply Minister Pu John Rotluangliana, Fisheries Minister Pi Vanlalawmpuii Chongthu, Industries Minister Pu H.Rohluna leh Mizoram Law Commission Chairman Pu John Siamkunga ten Emergency Meeting an nei a.

Home Minister Pu R.Lalzirliana chuan Tuirini lei dawh that meka vanduaina thleng chu pawi a tiin hetianga vanduaina a thlen laia mipui rilru ti chiai zawnga thi leh hliam zat thu dik tawk lo social media lamah theh darh a ni chu pawi a ti a. Home Minister hova meeting chuan he vanduaina lo thlen dan chungchanga thil awm dan chiang zawka chhui turin Aizawl District Deputy Commissioner/District Magistrate Pi A.Muthamma kaihhruaina hnuaiah Magisterial Inquiry din nise, din anih atanga thla 3 chhungin sawrkar-ah report thehlut turin an rel a. Hemi rual hian Tuirini lei chima boral ta Pu HC Lalfakzuala, Sesawng Venglai chhungte hnenah sorkar danin a phal angin zangnadawmna cheng nuai 4 leh he vanduaina hliam tuar, Laltleipuia, Thingsulthliah damdawi ina enkawl mek chu, a dinhmun azirin tanpuina pek tura tih a ni. A tul anga hma lo la nghal turin Mizoram Chief Secretary chu ruat a ni bawk.-DIPR

Post a Comment

Powered by Blogger.