HRISELNA CHANCHIN - THIN THIP (HEARTBURN)THIN THIP kan tih hi a thip lai dik tak chu Thin ni lovin Pumpui Hnun a ni zawk a. Pumpui leh Chaw kawng hnun a nat hian a rawn thip ta thin a ni. Hetia Pumpui hnun a nat hian mi thenkhatah chuan chil rialte siamin awm a ti nuamlo viau thei a ni.

He natna hi engtia lo awm nge?
Pumpui chhungah hian kan chaw ei lo ti zawp tu tur acid a awm a. Pumpui hnun leh chaw kawng inzawmnaah hian kawngka (valve) a tul huna inhawng thin a awm a. He kawngka hi a hun lovah a lo inhawng ve palh thei a. Chaw ei kham hlimah te hian a chip tur kha a lo chip lo palh thin a. Hetianga a inhawn takah chuan pumpuia acid awm kha rawn chhuak chhovin chaw kawng, pumpui hnun hi a rawn chiah ta a, hei hian a ti thip ta thin a ni. Tin, hemi avang nilo, kan thilei vang te a ni ve thein tho bawk. Theithur ei tam lutuk te, Coffee in tam lutuk avangte pawhin thin a thip kan tih mai hi a awm ve thei a ni.Eng anga in enkawl chi nge?
Hetianga thin thip veleh Antacids(Flagyl tih angreng) ei a tha a. Mahse chaw eikham apiang chuan ei loh tur a ni. Antacid hi a thawk rang a, mahse a reilo thung a. Damdawi chi dang H2 Blockers an tih hi a thawk muang na a, darkar 9 chhung hna a thawk thei a ni. Hetiang chi Damdawi hi i ei dawn a nih chuan i chaw eihma darkar chanve velah ei la, chaw i ei kham chuan hna a lo thawk tan tawh dawn a, na tawrh hmain min lo veng hman tawh dawn tihna a ni.


Kar khat chhunga thin thip hi vawi hnih aia tam i tuar thin a nih chuan natna, Gastro-Eosophageal Reflux Disease(GERD) i vei tihna a ni a, Doctor inentir ngei ngei a tha. Mahni a i damdawi i lo inchawh ve kha tha viau mahse, i dam hlenpui tak tak chuang lovang. Dam hlenpui si lova a na a chhuah leh thin chuan i kawchhung khan tawrh hun a la nei anga, nikhaw reia i la buaina mai mai tur zawk a ni. Chaw kawng/chaw dawt Cancer pawh a ti chhuak thei.

He natna GERD vei tawh tan chuan Doctor chawh ngei Damdawi ei a tha a. Amaherawhchu, damdawi hi ei reng a ngai ta thung a ni. A lehlamah chuan damdawi kan eiin kan na a chhawk loh chuan zai dam theih a ni bawk a. Doctor-in zai a recommend chuan tunlaiah chuan awlsam tein laproscope hmangin an zai thei tawh a ni. He an zai dan(procedure) hi fundopolication an ti.
chanchin hriselna huang
Hriat tur dang a awm em?
GERD hi vei tak tak hmain in ven dan a awm a. Chu chu kan ei leh ina insum leh kan nunphung tih danglam a ni. Chocolate, purunvar, hriak mawm lutuk leh zu lam chi reng reng hian thin thip a ti zual thei a. Hetiang avanga a zual chhoh telh telh chuan GERD chu kan vei a ni mai a. I thil eia i thin tithip zualtu chu chhinchhiah la, chung chu insum hmiah mai rawh.


Tin, chaw eikham hlima muhil mai chi i nih chuan muzal lovin muthilh tum rawh. Hetianga i ti theilo a nih pawhin i mutzalna kha khum a ni emaw thutthleng sei a ni emaw, i lu nghahna tur lam kha inchi 4 talin ti sang ang che. Thin Thip kan tih mai, Saptawnga Heartburn an tih hi i nei thin a nih chuan ngaihthah loh a tha hle;nakin zela buai loh nan. 

(Source : Hriselna Magazine March 2010 Vol. XXIII Issue No.3)

Post a comment

Powered by Blogger.