A CHHAN HRIAT LOHIN TON 35 DAWL ZO TURA NGAIH TUIRINI LEI DAWH LAI A CHIM, MI PAKHAT BORAL
Vanneihthanga Vanchhawng
13th February, 2018 (MSR) : Tukin zing dar 9:45 vel khan Sesawng leh Khawruhlian inkara Tuirini lei (Bailey Bridge) PWD in an dawh mek chu a chima a, Pu HC Lalfakzuala (46) Sesawng chu a hmunah thiin, Tv. Laltleipuia Hmar (27) Sesawng khua vêk chuan hliam a tuar a, damdawiinah enkawl a ni a, ngaihtuahawm a ni lo niin hriat a ni.
Tuirini lei hi kum 1973 khan dawh niin kum tamtak chhung hman a nih hnuah tuiek in hmun tamtak a ei chhiat nual tawh avangte leh a rinawm tawk tawh loh avangin a thara thlak turin sorkarin hma a la a, Essen company Kolkata ten a chak hi an siam a ni. Lei dawhna tur ruhrel hi ton 148 (kg 1,48,000) zet a rit a ni a, Kolkata atanga Tuirini kam phurh thlen nan hian kar thum chhung zet hun a duh a ni. Bungrua te a thlen kim hnuah January ni 8, 2018 atang khan lei dawh hna hi chak taka thawh chhoh nghal a ni a, a hmunah PWD Highway Circle-1 SE, Pu Bowman-a leh EE, SDO leh JE 3 ten hnathawktu mi engemawzat te nen riah chilhin ngawrh takin lei dawh hna hi an thawk thin a ni.
Lei dawh chhunga rit phur leh khualzin motor ten lui an kan na tur hi Lei chhak lawkah diversion kutcha road siam a ni a, rit phur leh khualzin veivak ten lei dawh avang hian harsatna an tawk lo a ni.
He Bailey bridge hi feet 200-a sei niin, hei hi bailey bridge thui ber chi (maximum span) niin engineer te chuan an sawi. Lei hi a structure dawh kai a ni tawh a, a chhuat erawh phah a la ni lo. Hnathawktu te veivah awlsam zawk nan thingzai phek khat zei zei, a sir khatah a tluan chhuakin kham a ni a, hei hi hnathawktu ni lemlo thlengin an zawh kai fo thin.
Tukin khan CE Highway Pu K Lalsawmvela chuan a naute hnathawk enpui turin Tuirini kai hi Aizawl atangin a pan chho a, lei chim hma lawk hian ral lehlama kai tumin lei hi zawh ve mai a tum a, SE Pu Bowman-a'n ti thang lo tan chuan a sang laiah luhai mai te a awl khawp a, thing phel pakhat phah zawm chauh a ni si a, tiin "a helna kawng lamah kan kai phei zawk dawn nia" tiin a rawt a, CE hian lei hi a zawh ta lo a ni. A tum angin lei hi zawh ta se a chim pui hman ve ngei an ring.
Vanduaina tawk ta Pu HC Lalfakzuala leh a tupa Laltleipuia te hian tukin zing dar 9:45 vel khan Sesawng lam kam atangin lui ral lehlam kai phei tumin lei-a thingphel phah chu an zawh phei a, chutih mek lai chuan lei dawh hnathawktu mi engemawzat te chu lei hmawr tawn tawnah, a then chunglamah lawnin a then hnuai lamah an lo awm ve bawk a. Pu HC Lalfakzuala te hian lei lai an thleng phei vel tawh tihin lei hi a chim ta a ni. Lei hmawr tawn tawna hnathawktu mi engemawzat awm ve te chu an inthiar fihlim hman hlawm a, Pu HC Lalfakzuala leh Laltleipuia te erawh lei hian a chimpui ta a ni.
Pu HC Lalfakzuala hi lei chim thla han in elh che vel chuan a lehlamah a vawrh phei niin a langa, lei zapui inkar awngah thla thlain a hnuai tui hlam hnih velah a pil zui ta a ni. Tleipuia zawk hi vaukam balu awmna hmunah a tla hlauh mai a, a him phah nia an ngaih thu lei chim laia mita hmutute chuan min hrilh a ni.
Lei chimin mi pahnih a chim pui tih an hriat veleh hna thawktu engemawzat chuan lui kam lam an pan thla nghal a, Tleipuia hi nikhaw hreloa a vaukam tiau phoa lo let reng chu an zuk hmu a, Pu Faka pawh li mawng atangin an hnuk chhuak ta a ni. Pu Faka hian a lu-ah hliam na tak a nei a, tuia a tlak hian a lu a sawhna avang hian che zui tur a awm lo niin an ring. Tui erawh a lem hnem hle niin a langa a pum pawh a puar nasa hle niin an sawi.
Pu HC Lalfakzuala hi tun hnaiah helai hmunah hian tuktin a rawn lang thin niin an sawi a, thing tanna (chainshaw) a keng thin a, khawiah emaw thing tan hna a thawk thin a nih an rin thu lei dawh hna thawk te chuan an sawi. Pu Faka hian a hmanraw ken a rih deuh thin vang nge, nidangah lei hi a zawh ngai miah lova, diversion kawng sial tharah lui hi a kan ziah thin. Tukina lei a vawikhat kannaa hetiang thil a thleng ta mai chu vanduaithlak an tih thu min lo hrilh mawlh mawlh hlawm a ni.
Lei hi engvanga chim nge ni ang tih zawhna chu; Engineer te chuan chhan ngaihna an hre bik lo. A ruhrel engkim uluk taka kilh khawmin an kham kai vek tawh a, a her rem leh khawih chet awlsam nan lei hlui a hmawr tawn tawnah feet 25 vel ve ve tur anla zawm belh bawk a, lei hian ton 35 zet dawl zo tura ngaih a nih laiin chhan hriat lohin a chim ta mai chu thawktu te an hrilh a hai khawp mai. Lei chhuat hi phah ni ta se a khawng phah deuh angem tia zawhna chu - "a khawng phah lovang, a rih phah ringawt ang" tiin egineer te chuan min chhang bawk a ni.
Tunhma lama bailey bridge chimna chhan nia sawi thin pakhat chu, 'a kilhna an ruk bo then vang' tih a ni fo thin a, he Tuirini lei hi siam thar hlim a ni a, a kilhna hi an ulukin hnathawktute viltu Officer te pawn chu chu an ngaihpawimawh leh an check ngun em em a ni a, a kilhna kim lo a awm hmel si lo. Ton 35 dawl zo tura ngaih ni si load a lak hmaa a ma rihnain a uai chim mai chu thil mak leh ngaihtuah zui ngai tak a ni. Hnathawktu pakhat chuan lei hmanraw thir hi a nih tur aiin a nem anga, a chakna hian a dawl zo lo a nih a rin thu a sawi a, ngaihtuahna a ti thui khawp mai.
Post a Comment