Ṭangrual pawl, Zoram Peoples' Movement (ZPM) chuan nimin khan an pisaah inkhawm an buatsaih a; ZPM-a tel ZNP president Lalduhoma'n thu sawiin, "ZPM chuan vote ni loin, thlai thar kan lei dawn,” a ti.
Lalduhoma chuan, ZPM-in sorkarna a chan chuan thlai hralhna rate tur hre sain kut hnathawktute'n thlai an ching dawn tih sawiin, "Vote ni lo in thlai thar kan lei dawn a, sawhthing leh hmunphiah phei chu lo chíng uar rawh u, a rate hre sain kan chintir dawn che u a ni," a ti a; ZPM hnuaiah chuan VIP culture tihbo a ni ang a, motor-ah designation plate tar a ni dawn lo a, chief minister-in portfolio a nei ve dawn lo tih a sawi.
Mizorama inthlan awm tawhah ruling party, member ngah ber anga lang si hneh taka paihthlak an ni tawh ṭhin tih sawiin, "Sorkar thlak nana kan luak hnu ei leh kan ching hi kan lo tih fuh loh awmchhun a ni. Kum 34 chhunga kan damdawi ei, kan ngeih si loh thlakna tura damdawi thar awmchhun chu ṭangrual pawl ZPM hi a ni," a ti. ZPM chu political party a ni lo a, Election Commission of India-ah an inziak lut lo tih a sawi bawk.
Lalduhoma chuan, February 13, 2018 zing lama Tuirini lei chima thi chhungte leh hliam an tawrhpui thu a sawi a, “Kum nga chhungin lei vawi ruk a chim ta. Lei chim zingah Bairabi Tlawng lei hi MNF sorkar laia DPR siam, contractor pawh MNF sorkar thlan a ni a, a bak zawng chu Congress sorkar kutchhuak a ni," a ti a; Darzokai lei pawh dawh nawn leh ni mah se, tun thlengin rit phur motor zawh phal a la ni lo a, passenger leh bungruate hlân thlak zel a la ngai tih a sawi.
November 2015-a Legislative Assembly session-ah House leader Lal Thanhawla'n 'Kan leite hi air condition kan vuah a nih ngawt loh chuan hei baka siam ṭhat ngaihna a awm lo,' tiin a sawi tih sawiin Duhoma chuan, "Indopui 2-na hun laia sap sipaite’n temporary bridge atana an hman bailey bridge tun thlenga rinráwla kan la neih hian hmasawnna a zuan lohzia a tichiang. Mipui rilru tina zualtu chu mawhphur ngam hruaitu kan nei lo hi a ni,” a ti.
ZNP President chuan, "Lei a chim chuan a DPR a fuh lo emaw, a hmanrua a chhia emaw, hna an uluk lo emaw, manṭang ei an tam vang emaw a ni mai," a ti a; ZPM chuan kalphung thar hmangin lei an dawh dawn tih a sawi.
Lalduhoma sawi danin, ZPM a sorkar chuan Equipment, Procurement, Contruction/Design-Build (EPC/D-B) system hmangin lei dawh a ni dawn. EPC/D-B system hnuaiah chuan hna zawh hun bituk chhungah zawh ngei tur a ni a, zawh a nih loh chuan contractor-in a mawh a phur ang. Zawh hun sawn hlat a awm dawn lo a, revised estimate a awm thiang lo.
ZPM inkhawmah hian general secretary K Sapdanga’n report a pe a ni.
-Vanglaini
Post a Comment