Vawiin ni chawhma khan Government Hrangbana College Seminar Hall ah Sahitya Akademi bultumin Mizo Academy of Letters leh Mizo Department, Government Hrangbana College chuan One day National Seminar on Biate Language an buatsaih a. Seminar hawnna Government Hrangbana College Seminar Hall a neihah hian I&PR Director Pu David L Thangliana chu khuallian a ni.
Pu David L Thangliana chuan Biate hnam chu Mizo hnam peng pakhat an nih thu leh Mizo hnam hrang hrang zinga thlang tla hmasa an nih thu a sawi a. Mizoram mai nilo thenawm State - Assam, Manipur leh Tripura ah te an awm darh tak avangin an awmna hmuna tawng lian zawk leh chak zawk ten a nek reng a, Biate tawng pawh ral mai hlauhawm khawpin tawng humhalh ngai nasa te zingah a tel ta a ni, a ti. I&PR Director chuan mahni hnam tawng humhalh nachang hria apiang khawvelah an ropui a, hnam ropui apiangin mahni hnam tawng humhalh leh tih hmasawn nan tan an la zual sauh sauh thin tiin Mizo Academy of Letters in Biate tawng zirna hun an buatsaih chu fakawm a tih thu a sawi a ni.
He huna Keynote Speaker Pu Darchuailova Renthlei chuan Biate te hi Mizo hnahthlak dangte ang thovin Chhinlung chhuak an ni tiin an chanchin chhui zauna te, an inrelbawl dan leh an sakhaw biak dan thlengin he seminar-ah hian mi thiamte paper buatsaih atanga zirho tur a nih thu a sawi a. Tawng ral mai hlauhawm zinga chhiar tel Biate tawng hmang hi tun dinhmunah mi 15000 vel an awm mek thu a sawi bawk.
Seminar hi Prof Laltluangliana Khiangte, President, Mizo Academy of Letters leh Mizo Department, Mizoram University-a Head of Department ni bawk chuan kaihruaiin Dr. Mihir Kumar Sahoo, Programme Officer, Sahitya Akademi, Kolkata chuan inlawmna hun a hmang a. Mizo Academy of Letters Jt. Secretary Dr Zoramdinthara'n lawmthu sawiin hawnna inkhawm hi tih tawp a ni.-DIPR
Post a Comment