Mizorama a vawi khat nan Chokhlei Kut (Rhododendron Festival) 2018 chu vawiin khan Mizoram Larsap Lt Gen. (Retd) Nirbhay Sharma PVSM, UYSM, AVSM, VSM chuan Lawngtlai District chhunga Sentetfiang khuaah a hawng.
Larsap chuan Mizorama a vawi khat nana Mizorama tualto pangpar ngei, chhawkhlei hming chawia kut buatsaih a ni chu lawmawm a tih thu leh a hlawhtlin nana tha leh zung sengtute inpekna zawng zawng chu fakawm a tih thu a sawi a. Chokhlei Kut chu state dang kut hmingthang tak takte el pha thei tur khawpa beiseiawm a nih thu sawiin, chuti ang a nih theih nan chuan a kut dawltu district mipuite chu theih tawp chhuaha tan la turin a chah a ni. Larsap chuan thil ropui tak tak chu thil te tham te atanga intan a ni thin tih sawiin, ram leh state ropui din tur paw'n khaw tin, district tina mipuite an pawimawh ber a ni, a ti a. Ram leh hnam tana mahni theihna zawna theih tawp chhuah turin Kut chhimtu mipui kal khawmte chu a sawm a ni.
Khual zahawm Lawngtlai East bialtu MLA Pu H. Zothangliana chuan Chokhlei Kut chu khuavel deng chhuak khawpa kut ropui leh hlawhtling ni thei tur, hnam ziarang leh khuarel thila ram hausakna chawi larna leh humhalhna tha tak ni bawk si a ni, a ti a. Kut chu hlawhtling taka hmang turin duhsakna a hlan a ni.
Kut hawnna hi Sentetfiang khelmualah chawhma dar 11-ah tan a ni a. Chairman, Lawngtlai Bawrhsap Dr Arun T., IAS chuan kal khawmte lawmna thu sawiin, Kut chu chhawkhlei par humhalhna tur leh tourism tihhmasawnna tura buatsaih a nih thu a sawi a. Lawngtlai DCF Pu PC Lalchhandama'n Chokhlei Kut buatsaih a nih dan a sawi a. LADC CEM i/c Pu H. Chhuanawma, CYLA General Secretary Pu LH Ramdingliana te pawhin thu an sawi a. LADC-a Revenue EM Pu C. Lallungmuana'n lawm thu a sawi.
Chokhlei Kut hi Larsap chuan darkhuang vua a, thalfang kapin a hawng a. Hawnna hun hman zawh hian department leh mimalin an thil siam chhuah an phona dawrte (stall) chu Khual zahawm leh mi pawimawh dangte nen an fang kual nghal a. Larsap hi Kut Organising Committee leh Sangau Joint Action Committee te'n chawimawina lai puan an lo pe a. Amah Larsap hian Sentetfiang VCP chu lawm thu sawina thilpek a hlan bawk.
Chokhlei Kut hi ni hnih awh tur niin, March ni 9 chawhnu hian khar a ni dawn a. Hornbill Festival rock contest winner Ronnie Lalrinmawia bakah, Lawngtlai District-a zaithiam lar tak takte an zai a. Cultural Club hrang hrangin hnam lam hmuhnawm tak tak an entir a. Tunlai lam hmuhnawm tak tak entir a ni bawk.
Kut-ah hian stall eng emaw zat buatsaih a ni a. Department leh mimal te'n an thil siam leh thar chhuahte pho chhuakin, an hralh nghal a. He'ngah hian mipuite'n an hriat duh angte an zawt fiah thei nghal a. Vety Dept chuan ran entirna (animal health camp) an hawng bawk a ni.
Vawiin hian chawhnu lamah cultural programme hman zui niin, naktuk lam hian rock concert, photo exhibition, Chokhlei Idol thlan, Chokhlei King & Queen thlan te pawh buatsaih a ni leh dawn a. Zingkarah ruahmanna fel tak hnuaiah Phawngpui National Park tlawh theihna hun ruahman a ni bawk. Kut hi LADC-a elected member te, sawrkar official te, NGO hrang hrang hruaitute leh mipui thahnem takin an chhim a ni.-DIPR
Post a Comment