mizoram assam ramri buainaVawiin khan Pu Satyendra Garg Union jt. Secy Home (N.E) kaihruauiin mizoram leh Assam sawrkar aiawh te Fact-Finding team chuan ramri chungchang ngaihtuahin Bairabi zophai hmun an tlawh.

Zophai hmun pan hma hian fact-finding team leh joint NGO aiawhte chu kolasib DC Conference Hall ah an thukhawm a. He hunah hian mzp aiawhin president Ramdinliana Renthlei leh CYMA president Pu Vanlalruata ten memorandum an thehlut a. Pu Vanlalruata chuan Mizoram chu India Sawrkar leh thenawm State te ina India ram chhung a nih na ang takin zah takin dawr thin se tha a tih thu a sawi a, ramri chungchangah pawh Sawrkar Laipui chuan fel leh dik taka thutlukna a siam a beisei thu fact-finding team hnenah hian a tarlang bawk a, march ni 8 a zophai hmuna Assam Police kut tuar zirlai te leh chanchinbu mite chu zangnadawmna Sawrkar Laipui in a pek ngei a phut thu a tarlang bawk a ni.

Pu C.Lalremruata North East Students Organisation pawhin MZP te memorandum thehluh chungchang sawiin Mizo mipuite ina ramri a an ngaih leh innghahna chu Bengal Eastern Frontier regulation 1873 tlawh chhana 1875 kuma ramri siam chu a nih thu tarlangin, hetih hun lai hian Mizoram chu British India emaw British myanmar hnuaiah a awmloa hemi avang hian hemi kuma ramri siam hi Mizo te ina Mizoram leh Assam ramri a an pawm dan a nih thu a sawi a ni. ministry of Home Affairs tichhuah Prime Minister's vision report march 2018 chuan Hailakandi a cheng mihring 98% chu dan loa pemlut (illegal immigrants) an nih thu tarlan a ni a, heng dan loa pem lut te lakah hian kan ram chhung chu hlauh kan tumlo a ni a ti bawk. Hemi bakah hian Delhi a CS level meetinga Zophai hmun hming dang vuah a tarlan chu an pawm ngailoh tur thu a sawi bawk a ni.
BAIRABI ZOPHAI TLAWH
Pu Satyendra Garg chuan remna leh muanna a awm chu thil thaber a nih thu sawiin ramri chungchang pawh Sawrkar laipui chuan dik leh fel thei ang bera tifel turin hma a lak tur thu a sawi ve ani.

Zophai hmuna thutkhawmah hian Mizoram leh Assam aiawhte an thukhawm a, thutkhawm zawhah Union Jt.Secy ina chanchinbu mite hnena a sawidan chuan zophai leh a chhehvel chu reserve area anih thu a sawi a reserve area huam chhungah eng lam mahin kut thlakloh tura an inrem thu sawiin hetih lai hian Hailakandi, Cachar leh Kolasib a Forest Hotute kaihhruaina hnuaiah joint Inspection team din a nih thu a tarlang a, he team hian April ni 30 ral hma in reserve area huam chhunga dan phalloa in emaw hmunhma (illegal structures) sak a awm leh awmloh an enfiah anga, dan loa sak a awm anih chuan dan hnuaiah thiah a nih tur thu a sawi bawk ani. Hemi bakah hian Union jt. Secy chuan Reserve area chu Mizoram emaw Assam emaw a nih thu sawi theih ala niloa, Union Home Secretary level ah report thehlutin la thutkhawm leh turin a beisei thu a sawi bawk a ni. Pu Satyendra Garg chuan chanchinbu mite zawhna chhangin Hailakandi huam chhungah dan loa pemlut an awm leh awmloh a hriatloh thu sawiin an awm anih chuan Assam Sawrkar in dan ang takin hma a lak a beisei thu a sawi a, Zophai hmuna Mizoram leh Assam Police Duty te chu vawiin tlaia an insaseng a beisei thu a sawi bawk a ni.
mizoram assam ramri buaina
He hunah hian Union Jt Secretary bakah hian Mizoram Sawrkar aiawhin Pu Lalrinliana Fanai, Commissioner & Secretary Home Department, Pu Biakzama Additional secretary Home, Pu David H Thangliana OSD Home, Pu Zarzosanga DC Kolasib, Pu Abhisek Dhania, Sp kolasib bakah Sawrkar hotu dangte an tel a, Tlawngai pawl aiawhin MZP, CYMA, NESO aiawhte an tel bawka Assam Sawrkar aiawhin Pi L.Sweety Changsan Principal Secretary Home & Political Department, R.M Singh DGP (Home) bakah District hotute an tel a ni.-DIPR

Post a Comment

Powered by Blogger.