"Nupui fanau chungchang sawi daih"

CM-IN COURT SANG ZAWK PUNAizawl : March 31, 2018 Kolkata-a a in neih zepa puhna leh a kum zat dik lo taka ziaka puhna case a neih chungchangah chief minister Lal Thanhawla chuan court sang zawk a pun a, hetah hian nupui pasal leh fanau lam hawi sawi a ni teh daih! A hnua-ah hei hi siamțhat a ni.

Court sang zawk hian lo pawmin chief minister punna hi tihhlawhtlin a tum na a, a case neihna court chuan a la buaipui zui tho. He case kal dan hi a mak sawt hle tih thu dawn a ni.

Chief minister hi 2013 inthlan dawn a 'affidavit' hmanga a ro neih sum te a puanchhuahah Kolkata-a a inhmun neih zepah leh inthlan dawna a kum zat a lo tarlan tawhte ti dik lovah puhin H. Lalhriatrenga Chhangte chuan Chief Judicial Majistrate (CJM), Serchhip ah a khing a, kumin January bi 17 khan case hi ziahluh a ni.

Hetih lai hian chief minister hi District & Sessiob Judge, Aizawl hnenah a lo zualko a, Serchhip CJM in he case a lo pawm hi a dik lo tiin, Ukil W Sam Joseph ruaiin court sang zawk punin, March ni 26 khan chumi chungchang chu ngaihtuah a ni.

March ni 26 ah la la hian District & Session Judge chuan order a chhuah nghal a. Serchhip CJM-In January ni 17, 2018 leh March ni 14, 2018-a order a chhuah ah eng case nge a nih tih a lang lo tih te, Hawla puhna te ngaihtuah turin hun rei taka mi a nih vangin hun a pel tawh titein order-ah chuan ziah a ni.

Chu order-ah chuan chief minister Lal Thanhawla case chu Cr.PC 125 tia ziahlan a ni ta daih a!, hei hi social media lamah pawh thehdarh a ni. Cr.PC 125 hi nupa leh fanaute chunghang lam hawi daih a ni a, nupa an ințhena fa enkawlna senso tum tura inkhinna leh chutiang lam hawi inziahna chu a ni. Serchhip CJM hnena Lal Hriatrenga Chhangte-in Lal Thanhawla a khinna case 125A of the Representation of Peoples Act a ni thung.

District & Sessions Judge hian a hnuah order a siamțha leh a, Lal Thanhawla case chu 125A of the Poeples Act tiin a dah ve leh.

Chutiang nuai chuan thil a kal a, District & Sessions Judge-in Lal Thanhawla zualkona a lo pawm chung chuan Serchhip CJM chuan March bi 28 khan he case hi a ngaihtuah chhunzawm ta tho.

March ni 28 hian Lal Thanhawla hi court-ah a inlan lo a, a aiawhin a ukil Lalremsanga Nghaka a inlan a ni. A ukil hian thiamthu sawi tura hun pek belh turin court hi a dil a, April ni 27 thleng hun pek a ni ta a ni.

Chutih laiin District & Session Judge-in April ni 4-a inlan turin inkhingate pahnih chu a hrilh ve thung. Chief Minister Lal Thanhawla case chu court pahnihin a ngaihtuah ta tihna a ni a, Lal Thanhawla'n Serchhip CJM lama a ukil leh District & Sessions Judge hnen lama a ukil rawihte chu mi hrang an ni teh tlat bawk.

The Aizawl Post,
Inrinni March 31st. 2018

Post a comment

Powered by Blogger.