- C.K.Hruaia


Hmuntha khua hi Kale-kabaw inthenna lai tak leh motor inkalpawhna kawngpui kama awm a ni a. In 1,000 khat awmna khua a ni. Hmunthaah hian hnam chhiar tlak chu chi thum (3) kan awm a; Kawl, Tedim leh Mizo lungrual takin kan chengho va, khaw thuihhruai khawper pahnih a nei a. Chhim lamah sawrkar ding lain a din thar Yanmiu Aung khua nen an inthenawm a, hmar lamah Maukawr (Phaya Yeshin) nen an inthenawm bawk.

Hmuntha khua hi kum 1956 march ni 9 zirtawp ni-ah Pu Thansanga, Pu Saichhuma, Pu Vanhauhva, Pu Sawiluaia leh Pu Tlailiana te chuan kum 3 chhung inphatsan hauh lo tura thutiam nghet tak siamin, an chenna Khampat khua chhuahsanin, an sat ta a ni. Pu Thangtawia hi Hmuntha khua sattute hminga Football Cup chhuah hmasa ber niin, khaw sattute zingah telh ve a ni.


HMUNTHA KHAW CHANCHIN

Khaw hming satu leh sak chhan

Leilet phaizawl nuam tak leh Zotui thiang tak awmna hmun a nih avangin, Tahan khua Pu Lalzinga (Pu Thansanga pa) in Hmuntha tiin khaw hming a sa a. Hmuntha khuaah hian Mizo vengah ngawt pawh Sakei lu, lu 3 aih a ni tawh. A hmasa ber chu kum 1959-a Pu Saichhuma kah a ni a, sum nga vela lian a ni. A pahnihna chu kum 1966-a Pu B.Lalasanghleia kah a ni a, sum 6-a lian a ni. Pathumna chu Pu Laithangpuia kah a ni leh a, hei hi kum 1980 September-a Hmuntha Sakei hrang tihbaiawm tak kha a ni.

Khaw Pianhmang

Hmuntha khua hi Kale-Kabaw ramri lai tak kawngpui kama awm a ni kan tih tawh kha. Chhim leh Hmar hawi motor kawng bawha awm a ni a, mel khat (1.609344 km) tha zeta thui , khaw dung sei tak a ni. Khaw chhungah lui lian ve tak pahnih a luang a, chungahte chuan thir lei (bridge) mawi tak an dawh tlang ve ve a, khaw nuam tak a tling ve a ni.


Khaw tawntir chhim lamah unau Tedim-ho an cheng a, a laiah kawl unaute chengin, hmar lamah chuan Mizo kan cheng thung. Tawng dang pawlh buaitu awm hauh lovin, hnam nun humhalh a ni a, tundin a ni reng zel bawk a ni. Chuvangin, Khualleng unaute leh Tiaural zawl lai unaute pawhin Kale-Kabaw phai zofate chenna khuaah chuan tawng hmang dik ber khua tia sawi a hlawh ve reng a ni awm e.

Thlawhhma

Hmuntha khuaah hian chawhrualin leilet (Rice Field) ram hi acre 1,649 laia zau a awm a, Buhl eh bal pawh a thar hlawk thei hle. Ram chhung thing leh mau pawh Kale-Kabaw phaia cheng mi tin tlan tham tak zet a awm a, tunah pawh tuahthing leh in chak thing leh mau, mite purchawkna ber a la ni reng mai a ni. Tin, thingtlang (village) lo a tha-in, buh leh bal, thlai chi tin a hlawhtling tha duh em em a. Hmuntha Lakhuihthei (Pineapple) phei chu hralh a tla bik hle a ni. Fu (Sugarcane) pawh a tha duh hle a, a chingtute chu an hlawhtling deuh zel.

Nunphung leh Khawsak dan

Hmuntha khua hi kan tarlan tak angin, kum 1956-ah in panga (5) lekin khawhar taka an lo din ni mah se, kum 50 chhung lekin in 1,000 lai kan lo tling hman a. Hnam chi 3 inchen pawlh kan ni a, a tam zawk Christian kan nih vang nge ni, buaina leh innghirnghona lian tham sawi tur a awm lo va. inngheih takin kan chengho dial dial thin. Kum 1956 atanga kum 1965 thleng phei kha chu ei leh bar kawngah pawh, bik awm lovin, kan eiin kan inho thin. Chhuanchham leh mi harsate awm bik phal lovin, kan inpeizawn tel tel thin a, ram vak Pasalthate’n ramsa an hlawhtlin pawhin, an tlangzam a, inang khatin an eiho thin a ni.

HMUNTHA KHAW CHANCHIN Kum 1991 vel atang phei chuan UNICEF-in Ks. 300,000 sengin lui hnara tui an lak chhuahsak a. Ni 9 january, 2009 atangin Hmuntha Presbyterian kohhran hmalaknain, Mizo veng bil huapin, lui hnar tui thianghlim an la a. April ni 30-ah mahni tualzawla tui herh haw theihin an peih fel a ni. He tui thanghlim laknaah hian Ks.11,556 zet an seng a, PCM hmalakna hi khawtlang mipuiin an fak hle a, kan biak Pathian tanpuina an dawng tak zet a ni.

Sakhaw lam - Religion

Hmuntha khuaah hian Buddhism leh Kristian sakhua chi hnih chiah a awm a. kristiante zingah erawh chuan kohhran a tam hle. Tedim unaute lamah kohhran 15 vel a awm a, Mizo vengah pawh kohhran 12 vel zet a ding bawk. Rinna lamah pawh kan thang hle tawh niin a lang. Lalpa tan tan la sauh sauh zel ang u. Tin, Hmuntha Mizo hian Pathian rawngbawltu, Pastor, Evangelist leh Tirhkoh 20 chuang kan lo hringchhuak ve tawh nghe nghe a ni.

Zirna lam

Hmuntha khua hi zirna (Education) lamah ve thung chuan khaw vanduai pawla sawi theih a ni hial awm e. Mizo vengah kum 1957 atang 1964 khan kohhran school-ah lehkha zirtir a ni a. tichuan, kum 1964 atang chuan khawtlangin mawhphurhna a la ta a, tuna Mizo veng Affiliated Primary School hmun hi bul kan tanna chu a ni. Kum 1968/69-ah tuna sawrkar Primary School awmna hmunah khian sawn chhoh a ni a, Yazagya School nen inzawm-in, Primary School an din ve a. kum 1975-a Pu Saphnuna Khaw lal a nih lain, Sawrkar School hmuh a ni. School chu Mizote tan a hlat deuh hlek avangin, Mizo vengah Primary School chu, school hmun hluiah tho chuan kum 1990 khan an din leh a. Mahse, school in an neih loh avangin, kum 2 chhung chu thalai Hall an hmang. Kum 1992-a an sak zawh tawh school chu, vanduaithlak takin, ni 12 april, 1995-ah ram kangin a rawn nuai tel vek a. Thi leh thau pawlhin khawtlang mipuiin school sa tha lehin, hna an thawk leh ta fan fan a. june thla school luh hmain, school in thar an sa a, kum khat mah an khaihlak lo. Kum 2013 khan sawrkar Primary School kan hmu ve ta a, zirtirtu (teacher) pawh mi 5 kan nei nghal. Mihring tam lam en chuan, High School pawh nei ve awm kan ni na a, tun thleng hian kan la nei lo. Chuvangin, Hmuntha khawtlangah hian zirna lamah nasa lehzuala tan lak a ngai a, zirna tha zawk nei turin kan kovah hmabak mawhphurhna lian tak a innghat a ni tih hriat a pawimawh hle. Chuti ang a nih mek laiin, kum 2006-a khaw din kum 50-na champha ‘Golden Jubilee Committee’-in a buatsaih, Hmuntha chanchinah Graduate mi 50 vel kan lo hring chhuak ve reng tawh mai a. Bethlehem khaw te tak tea Lal Isua a piang kha a ang hial awm e.


Inawpna lam

Hmuntha khua din tirh chuan Yazagyo (Zazu) awp khawper pakhatin kan awm a, Zazu khua awpna hnuaia khawper pakhat mah ni se, Hmuntha khaw chhung tak hruaitu kan mamawh vet ho avangin, khaw sattute zinga a ram tawng lo thiam deuh ber leh hotu chan chang deuh bera kan lo neih thin, Pu Thansanga chu Lal atan an thlang ta a. chumi hnu chuan a remchan dan ang zelin lal thlan a lo nit a thin a. lal 23 vel an lo awm tawh nghe nghe a ni.

Hnam Culture humhalhna lam

Hmuntha khua hian kawng hrang hrangah tlakchham nei ve thin bawk mah se, hnam nun humhalh leh vawn him kawngah chuan tan la ve thei tak khua kan ni a. mahni hnam innghaihsak tak leh hmangaih tak khua kan ni bawk. Mipuite’n chhiat ni, that ni chungchangah theih tawp tak meuh chhuahin kan inpeizawn thin hi a lawmawm hle bawk a ni.

Khaw mipuite hian theih tawp kan chhuah chuan Hmuntha khua hi khaw nuam tak leh tha tak a ni reng ang a, khaw changkang leh hausa tak a ni thei bawk. Thing leh mau a la tam hle a, thlai chi hrang hrangin a ram leilung a ngeih avangin, thla chin lamah rem hre taka thawkte chu an hlawhtling zel thin. Theihai huan leh Laichis huan siamte pawh a hlawk thawkhat hle tawh a. Thelret (Rubber) pawh kum hnih/thum kal ta mai atang khan sawrkar leh mimalin an ching tan a, a that duh hmel hle. Thenawm ram, India-a thawnchhuah (export) tham kan thar theih hun a la awm ve ngei ang.


Telecommunication

Hmuntha khuaah hian hmun dangte nena inbiak pawh theihna Phone, Mobile Phone-te pawh a lo tam ve tan ta hle a. kum 2014 chhung hian Mizo vengah chauh pawh in 10 chuang phone landline hman theihna a awm hman der tawh a ni. Tun kum 2014-2015 chhung hian Tedim vengah Ooridoor Company in Tower pakhat, Mizo vengah Telinor Company-in Tower pakhat din turin hma an la ve ve a. Hun rei lo te, 2015 chawhma lamah chuan, awlai leh nuam takin, inbiakpawhna Internet (Facebook/Twitter etc.) leh Mobile Phone kan hman theih beisei a ni.

Intundin huam, khawtlang hmangaihtu, khawtlang thatna tura hnung lam chhawn ngai lo thalai hruaitu mi hratkhawkheng indawt chhawng zel, mi 23 vel zette inpumpekna te, khawtlang lal 23-te hmahruai thiamna te, leh kohhran hrang hrang rawngbawlna nung leh duhawm tak avangte hian, Hmuntha khua hi Pangpar chi tha ber kung chunga Pangpar mawi ber ang hian, kan Zo khawvelah kan la par vul ngei ang tiin, Hmuntha khua mipuite duhsakna sang tak ka hlan a ni e.

Christmas lo thleng tur hi hlim tak leh lawm taka in hman theuh ka duhsak che u a, Lalpa tan, chhungte tan, leh khawtlang tan in hunte in hman ngei ka beisei....

Post a Comment

Powered by Blogger.