INREMNA A PAWIMAWH - NEWS COMMENTARY : 10.03.2018 (Zing dar 7) - TIMES OF MIZORAM

Breaking

Home Top Ad

Post Top Ad

INREMNA A PAWIMAWH - NEWS COMMENTARY : 10.03.2018 (Zing dar 7)

ALL INDIA RADIO NEWS AIZAWL REGIONAL NEWS UNIT


Ziaktu : HC Vanlalruata Principal Correspondent, PTI

mizoram-gov-hpcd-signed-agreement-2018Tunkar Nilaini leh Ningani khan Manipur behchhana rammu mek, Hmar People’s Convention (Democratic) leh Mizoram sorkar aiawhte chu a vawi khatna atan Politic level-a inbiakna an nei ṭan a. Kum 2016, August ni 10 aṭanga official level-a inbe ṭan, tun ṭuma remna thlen tuma inbiakna hi a la tluang chho zel niin a inbiate chuan an sawi a. Hmar hnam politics harsatna chinfel ngei theih an beisei thu an sawi bawk. Remna hi a pawimawh a, remna tluantling a awm chuan Mizoram hmarchhak bial, Manipur depa awm mipuite tan bik phei chuan a lawmawmin helna a tawp tak tak a nih chuan, “Hmar thimpui,” tia an sawi ṭhin, helai bialah hian hmasawnna hna pawh awmze neiin thawh theih a beiseiawm a ni.

HPC(D) hel pawl hi kum 1994-a, khatih laia rammu HPC leh Mizoram sorkar inrem hlim, HPC miten an ralthuam an dah hnu lawka inremna thuthlung pawm ve lote din a ni a. A dintu hi khatih laia HPC hruaitu lawk zinga tel pha Lalhmingthanga Sanate a ni a, India Constitution Schedule parukna tlawhchhana Hmar mipuite tana autonomous district council hrang din ngiat zui ta zel an ni. Manipur aṭanga ṭanin Mizoramah tharum thawhin dan kalha chetna an kalpui chho zel bawk a. Chutianga thil a kal mek lai chuan he pawl hi a phel ta a. Tuna sorkarin a biak mek H. Zosangbera kaihhruai leh a tira dintu Lalhmingthanga Sanate kaihhruaite chu inṭhen phawkin an inmil lo hle nia hriat a ni a, Sorkar nena inbe mek hi a lian zawk leh chak zawk an nih thu Police lam chuan an sawi.

Inbiakna leh inremnaah hian a tawn tawna rinawm hi a pawimawh em em a, chutiang a nih loh chuan inremna hi a tluantling thei lo fo va: remna siam raw sek sek, muanna tihchhiat a ni leh fo ṭhin. India sorkar leh MNF rammute inremnaah khan MNF ho kha an fakawm hle a, an vaiin an lokir vek mai ni lovin, kum 1986 June ni 30-a inremna thuthlung an ziaha anmahni lam tih ve tur zawng zawng kha an ti zovin, khatih laia India sorkar pawhin a tihtur a ti ve bawk a, la tih hlawhtlin loh ṭhenkhat la awm nia sawi hi zir chian a ṭul a, sorkar laipui hian a tihtura a intiam hi a tihlawhtling lo a nih chuan bawhzui a ngai ngei ang. 

Kum 1994-a HPC leh Mizoram sorkarin Inremna thuthlung an ziah khan inremna ziak satliah an ang hle a. A tawn tawnin ti tak tak (sincere) lova ngai an tam hle. Kum 1993 kha inthlan kum a nih avangin sorkarna chelhtu lamin politics thila hlawkna an chan theih dan tur bak an ngaihtuah lutuk lo va, chutiang bawkin HPC lam pawhin an ralthuam vawn tak tak an tung lo nia sawi a ni a, ṭhenkhat phei chuan PHE tuidawt aṭanga siam ni awm tak tak silai lem an tung mai mai niin an sawi. Chumiin a hrin chu hel pawl dang lo piang leh hi a ni. Lehlamah lah chuan Inremna thuthlung angin sorkarin thil a kalpui bik lo va, inremna thuthlungin a hrin Sinlung Hill Development Council-a thuneitu tur mipuiin an thlan chhuah tura inremna thuthlunga awm chu tun thlenga tipuitling lovin sorkarin a duh duh a la ruat chho ta zel a. Sorkar a inthlakin an mi duh zawng an ruat mai mai zel zawng a la nih hi, vawiin thleng hian.

Hetianga pangkhing ang reng taka inremna ziaha tihpuitlin fumfe ni ta lovin a hrin chu kan hmu vek a. Inremna thuthlung an ziak a, remna leh muanna tluantling erawh chu a awm phah lo va. An mite tana beitu nia insawi rammute pawh an thawhsak nia an sawi mipui harsatna siamtu an ni thei tih kan hmu a. A theih hram chuan tharum thawh lova thil kalpui hi a ṭha ber fo tih pawh kan hmu bawk. Chutih rual erawh chuan kan chanvo ngawih ngawih ni-a kan hriat min pe duh tlat lo nia kan ngaih laka lungawi lohna lantir leh kan chanvo nei tura kawng hrang hranga kan kar ve erawh hi chu a ṭul fo ṭhin.

Tuna inbiakna kal mekah pawh hian sorkarna chelhtu lam hian assembly inthlan kum a nih avanga politics lama hlawkna ngawt ngaihtuahin remna siam hi tum lo sela, muanna tluantling a thlen theihna atan tih tak zeta thil a kalpui a ,ul a. Chutiang bawkin HPC (D) lam pawh an rinawm tur a ni ang. Inremna thuthlung reng reng hi a inbia te pahnih duhthusam a ni ngai lo va, inrem lote inrem theihna dan ber tura sir tluk a ṭul chang pawh a awm ṭhin. Chutiang a nih pawhin inremna siam a nih tawh chuan a tawn tawnin an inremna thuthlungah an rinawm tur a ni a, chu chuan muanna tluantling a thlen chauh vang.

Hmana HPC leh tuna HPC (D)-te duhdan leh thil ngiat hi ngaihtuah chian a, ngaihtuah thui a ngai hle mai. Meghalaya ramah chuan Shillong khawpui chhunga European Ward tih loh khu chu tlangmite ram (scheduled area/tribal area) a ni vek a. India Constitution-a Schedule parukna hnuaia din autonomous district council huam chhung vek a ni. Chutiang a nih avang chuan European Ward tih lohvah chuan tlangmi (tribal) ni ve loten ram an nei thiang lovin an nei thei lo. Keini erawh chu Chhimtuipui district-a autonomous district council pathum huam chhung tih lohvah chuan heti zawng hi kan ni.

Sorkar laipui hian min hlahthlem zui zel lo ta sela, income tax chawi tur te, tlangmi ni lo ram pe tur tein min tilui ta sela chuan kan sorkar hi a ṭang huai thei hauh lo vang. India Constitution Schedule parukna huam pawna awm hi Mizoram zau zawk fe a ni miau a ni. Kum 1994-a Mizoram sorkar leh HPC inremna thuthlungah khan Mizoram pumpui hi Schedule parukna hnuaia Autonomous district council-a dah let leh vek turin Mizoram sorkarin ṭan la rawh se tih ang deuh an dah a. Mahse, a taka bawhzui erawh chu a awm lem lo.
Helai takah hian hnam leh chi bil hminga Mizoram ṭhendarh hi kan ven a ṭul rualin hnam kan nihna, tlangmi (scheduled tribe) kan nihnaa kan ram leilung leh hnam kan humhalh theihna, India Constitution behchhana kan hnam kalphung kan vawn him theihna hi ngaihtuah a ṭul hle. Kan ram hruaitute hian thiam taka thil an tih phawt chuan Mizoram pum hi scheduled area-a dah leh theih a nih a rinawm a. Chutianga tha kan thawh loh chuan India state danga awmte ang bawka income tax kan chawi ve hun te, kan ram leilunga a duh duhin ram an neih theih hun te, Inner Line Permit an hlih hun te a lo thleng a nih pawhin kan hawihil khawp ang a, dan tlawhchhan tur kan nei hauh lo vang le. Tun hi ngaihtuahna sen hun a ni a, ngaihdan mum leh felfai tak neih hun a ni e. Bengsika ngaihtuah hun tak a ni a. HPC (D)-ten a tira an thil ngiat hi Mizoram pum tana thil ṭha ni-a kan hriat chuan chulam chu i hawi teh ang u. Tlawma lak chi pawh a nih hmel loh

No comments:

Post a Comment

Post Bottom Ad